-अञ्जली थापा 
हेटौँडा । प्रदेश नं ३ को प्रदेशसभाको पहिलो बैठकमा उपस्थित सांसदले प्रदेशको राजधानी कहाँ राख्ने भन्ने विषयमा फरक फरक प्रतिक्रिया दिनुभएको छ । 

सरकारले प्रदेश नं ३ को अस्थायी मुकामका रुपमा मकवानपुरलाई तोकेको छ । स्थायी राजधानी तोक्ने अधिकार प्रदेशसभामा रहन्छ । नेकपा (एमाले) का उपाध्यक्ष तथा प्रदेश सांसद् अष्टलक्ष्मी शाक्यले सञ्चारकर्मीसँग कुरा गर्दै प्रदेशको राजधानीको विषयमा भन्नुभयो, “हेटौँडा हरेक किसिमले सुन्दर छ, पहिला अस्थायी राजधानी तोक्दा अलि असहज लागे पनि अहिले सबै खुशी छन् तर पार्टीले यसमा आधिकारिक धारणा बनाइसकेको छैन ।” 

नेकपा (माओवादी केन्द्र)का शालिकराम जमरकट्टेलले हेटौँडालाई प्रदेश राजधानीको लागि उपयुक्त रहेको बताउनुभयो । उहाँले भन्नुभयो, “राज्यको लगानी यहाँ भइसकेको छ, र पूर्वाधार पनि बन्ने क्रममा छ, त्यसैले मेरो मत यहीँ राजधानी राखिनुपर्छ भन्ने हो ।” माओवादी केन्द्रकै राधिका तामाङले आफ्ना लागि हेटौँडा राजधानीको पायक नपर्ने बताउनुभयो । उहाँले भन्नुभयो, “सरकारले के सोचेर अस्थायी मुकाम तोक्यो बुझ्न सकेको छैन, यहाँ राजधानी हुनु हुँदैन ।” 

नेपाली काँग्रेसका इन्द्रबहादुर बानियाँले पहिलो पटक भएको संसद् बैठक गृह जिल्लामा हुनाले उत्साहित बनाएको बताउनुभयो । उहाँले अस्थायी मुकाम हेटौँडामा तोकिनु सरकारकोे वैज्ञानिक निर्णय भएको बताउनुभयो । उहाँले भन्नुभयो, “प्रदेशको राजधानी हेटौँडा हुँदा आर्थिक हिसाबले पनि प्रगति हुन्छ किनकि यो आर्थिक नाका हो ।” 

जिल्ला जनस्वास्थ्य कार्यालय मकवानपुका कर्मचारी लक्ष्मण दाहालले पहिलो पटक संसद्को बैठक हेर्दा सिंहदरबार हेटौँडामा आएको अनुभव भएको सुनाउनुभयो । 

नेपाल पत्रकार महासंघ मकवानपुरका पूर्वअध्यक्ष नवराज शर्माले बैठकले दर्शक स्रोतादेखि सांसदसम्मलाई कौतुहलता दिलाएको बताउनुभयो । “हामी सबैमा अब के हुन्छ भन्ने जिज्ञासा अन्तिम समयसम्म कायम रह्यो, हामीलाई कार्यतालिका थाहा भए पनि बिल्कुलै नौलो लाग्यो र कौतुहल कायमै रह्यो”, उहाँले थप्नुभयो, “यो बैठकले हामीलाई सभ्य र ‘सिस्टम’ नि सिकाएको छ ।” 

मकवानपुरका सञ्चारकर्मी राममणि दाहालले बैठकले मुलुक संरचनामा गएकोे र संघीयता प्राप्त भएको महसुस दिलाएको बताउनुभयो । उहाँले यो क्षणलाई ऐतिहासिक रुपमा ग्रहण गरिएको समेत बताउनुभयो । उहाँले भन्नुभयो “अब भने हामी संघीयतामा गयौँ भन्ने महसुस यो बैठकले प्रत्याभूत गरायो ।”