काठमाण्डौ । विश्वको सबैभन्दा महत्त्वपूर्ण व्यापार मार्गहरू मध्ये एक पानामा नहरमा पानीको सतह घट्दा पानी जहाजको आवतजावतमा ३६ प्रतिशत कटौति गरिएको छ ।

गत वर्ष देखिएको भिषण खडेरीका कारण नहरमा पानीको सतह घट्दा अधिकारीहरुले नहर भएर यात्रा गर्ने जहाजको यात्रा कटौति गरेका हुन् ।  

पानामाका अधिकारीहरूले बुधबार नयाँ कटौती घोषणा गरेका हुन् । 

नहर प्रशासकहरूले पानीको स्तर  घट्दा सन् २०२४ मा ५ सय करोड डलर देखि ७ सय करोड डलरसम्म घाटा हुने अनुमान गरेका छन् ।मध्य अमेरिकी राष्ट्रमा अहिलेसम्मकै सबैभन्दा गम्भीर खडेरीले ५० माइलको सामुद्रिक मार्गमा तनाव सिर्जना भएको छ ।

जसले गर्दा जहाजको ट्राफिक जाम बढाउनुका साथै अन्तर्राष्ट्रिय ढुवानीका लागि नहरको विश्वसनीयतामा शंका उत्पन्न भएको छ । यसका साथै विश्वव्यापी व्यापारमा यसको असरबारे चिन्ता बढाएको छ।

बुधवार, पनामा नहर प्रशासक रिकार्टे भास्क्वेजले दैनिक जहाज २४ वटा आवतजावतमा कटौती गरिने बताएका छन् । 

नहर अधिकारीहरूले खडेरीका लागि एल निनो मौसम घटना र जलवायु परिवर्तन जिम्मेवार रहेको बताएका छन् । यसका साथै उनीहरुले पनामाले नहरको सञ्चालन र मानव उपभोग दुवैको लागि नयाँ पानीका स्रोतहरू खोज्न आवश्यक रहेको बताएका छन् । 

नहर भर्ने एउटै तालले ४० लाखभन्दा बढी जनसंख्या भएको पनामाको ५० प्रतिशतभन्दा बढीलाई पनि पानी उपलब्ध गराउँछ ।-एजेन्सी