प्रचण्डसँगको भेटघाटको सूइँको पाएपछि झस्किएका ओलीले देउवालाई बोलाए

काठमाण्डौ ।सरकार गिराउने खेलमा लागेका प्रचण्डले प्रमुख प्रतिपक्षी दल नेपाली कांग्रेसका सभापति शेरबहादुर देउवालाई भेटेको खबर पुगेपछि प्रधानमन्त्री तथा नेकपाका अध्यक्ष केपी शर्मा ओली झस्किएका छन् । 

प्रमुख प्रतिपक्षी दलका सभापति र आफ्ना पार्टीका कार्यकारी अध्यक्षबीच पछिल्ला दिनहरुमा बाक्लो भेटघाट भइरहेको सूचना पाइरहेका ओलीले परिस्थितिको मूल्याङ्कन गर्ने उद्देश्यले शुक्रबार देउवालाई बालुवाटार बोलाएका छन् । 

प्रधानमन्त्री ओलीले आजै बिहान ११ बजे आकस्मिक मन्त्रीपरिषद बोलाएर पार्टीभित्रै र प्रतिपक्षी दलहरुबाट विरोध आएको भन्दै दल सम्बन्धी र संवैधानिक परिषदसम्बन्धी अध्यादेश फिर्ताका लागि राष्ट्रपति समक्ष सिफारिस गर्ने निर्णय गराइसकेका छन् । 

दुई अध्यादेश फिर्तापछि उनले विकसित नयाँ घटनाक्रमको विषयमा छलफल गर्न भन्दै कांग्रेस सभापति देउवालाई बालुवाटार बोलाएका बताइएको छ । 

तर, ओलीले आजै देउवालाई बोलाउनुको भित्री उद्देश्य भने फरक रहेको स्रोत दाबी गर्छ । 

हिजो(बुधबार) साँझ भैंसेपार्टीस्थित बामदेव गौतमको निवासमा नेकपाका ६ सचिवालय सदस्यहरुको बैठक बसेको थियो । सो बैठकमा सरकारले अध्यादेश फिर्ता लिनुपर्ने र यसमा ढिलाई गर्न नहुने सहमति बनेको थियो । प्रचण्ड, झलनाथ खनाल, माधवकुमार नेपाल, बामदेव गौतम, नारायणकाजी श्रेष्ठ र विष्णु पौडेलको सहभागितामा सचिवालय बैठक भएको थियो । सो बैठकले अध्यादेश फिर्ता लिए पनि स्थायी समिति बैठक बोलाउनुपर्ने निश्कर्ष समेत निकालेको थियो । 

बैठक सकेर सबै आ–आफ्ना निवासतर्फ लागे पनि प्रचण्ड भने अरु नेतालाई जानकारी नै नदिई शेरबहादुर देउवालाई भेट्न उनको निवास पुगेका थिए । यो विषयमा भैंसेपाटीमा छलफलमा जुटेका नेताहरुले पनि शुक्रबार बिहान मात्र थाहा पाएका थिए । यो विषय प्रधानमन्त्रीको समेत कानमा परेपछि उनले कुरा बुझ्न देउवालाई बोलाएका हुनसक्ने स्रोत दाबी गर्छ ।