काठमाण्डौ । डिशहोम फाइबरनेटले धेरैजना मानिसहरु भएको क्षेत्रका लागि उपयोगी हुने इन्टरनेट प्रविधि क्याम्पस वाईफाई सोलुसन बजारमा ल्याएको छ।

भृकुटीमण्डपमा जारी सूचना प्रविधि मेला ‘क्यान इन्फोटेक’मा शनिबार यो प्रविधिको कम्पनीले लन्च गरेको हो। कम्पनीका प्रबन्ध निर्देशक सुदीप आचार्यले डिशहोम फाइबलनेटको स्टलमा आयोजित कार्यक्रममा सिक्सजी प्रविधिमा आधारित ह्वावे प्रविधिको राउटर लन्च गरे। 

आचार्यले यस किसिमको प्रविधि ल्याउने डिशहोम पहिलो रहेको दाबी गर्दै यसअघि पनि धेरै प्रविधिहरु भित्र्याउन आफूहरु पहिलो हुने गरेको अनुभव सुनाए। आचार्यले डेढ वर्षको छोटो अवधिमा डिशहोम फाइबरनेटका १ लाख २० हजार ग्राहक पुगेको उल्लेख गर्दै आज लन्च गरिएको नयाँ प्रविधि भविष्यलाई दृष्टिगत गरेर आफूहरुले लन्च गरेको बताए। 

डीटीएच (डाइरेक्ट टु होम) प्रविधिमा टेलिभिजन सुरु गर्दा पनि आफूहरुले भविष्य हेरेर नै गरेको र सो प्रविधि अहिले लोकप्रिय रहेको उदाहरण दिँदै आचार्यले क्याम्पस वाईफाई सोलुसन्स पनि उपभोक्ताको आवश्यक र रुचीमा पर्ने विश्वास व्यक्त गरे। 

डिशहोमले ल्याएको क्याम्पस वाईफाई सिक्स विशेषगरी धेरै मानिस काम गर्ने बैंक, बीमा, सरकारी कार्यालय, विद्यालय तथा क्याम्पस, होटल, रेस्टुरेन्टजस्ता शैक्षिक संस्था, विज्ञान तथा अनुसन्धानमूलक संस्था, व्यवसायिक संस्था, सुपरमार्केट, रंगशालाका लागि उपयोगी हुन्छ। उच्च क्षमताको यो वायरलेस प्रविधिले एकल नेटवर्कमा विशेष क्षेत्रभित्र सिग्नल फैलाउन सशक्त भूमिका खेल्छ। 

क्याम्पस वाईफाई सोलुसन्सका लागि आउने एक्सेस प्वाइन्ट डिभाइस (एपी) धेरै प्रकारका हुन्छन्। यो वाईफाई सिक्स प्रविधिमा आधारित भएकाले यसमा एआई (आर्टिफिसियल टेक्नोलोजी) पनि हुन्छ। एआईले व्याण्डविथलाई अटो क्याप गरिदिने भएकाले चलिरहेको कुनै वेभसाइट, भिडियो अवरुद्ध हुन पाउँदैन्। 

यसमा सिमलेस रोमिङ हुने भएकाले एउटा राउटरबाट अर्को राउटरमा जाँदा गरिरहेको फोन काट्टिन पाउँदैन्। अटो स्विच भएर अटो कनेक्ट हुने डिशहोम फाइबरनेटका प्राविधिकहरुको भनाइ छ। 

क्याम्पस वाईफाई सोलुसनको सबैभन्दा ठूलो विशेषताका रुपमा रहेको धेरैजनाले एकैपटक वाईफाई चलाउन मिल्नु नै रहेको उल्लेख गर्दै प्राविधिकहरुले एउटै एपीबाट एक पटकमा दुई सय जनाभन्दा बढी कनेन्ट भएर वाईफाई चलाउन सक्ने बताए।