काठमाण्डौ । सुदूरपश्चिम प्रदेशमा स्टार्टअप एन्ड आइडिया फेस्ट तथा डिजिटल सुदूरपश्चिम संवाद सम्पन्न भएको छ।

सुदूरपश्चिम प्रदेशको राजधानी धनगढीमा सोमबार आयोजना भएको ई–बीमा स्टार्टअप एन्ड आइडिया फेस्ट तथा ह्वावे डिजिटल सुदूरपश्चिम संवाद सम्पन्न भएको हो। दिउँसो १ बजेदेखि सुरु भएको फेस्टमा ३० भन्दा बढी स्टार्टअप तथा आइडिया सहभागी भएका थिए। उक्त समयमा एक्सपिरियन्स सेयरिङ, मेन्टरिङ सेसन र आइडिया पिचिङ सेसन पनि आयोजना भएको थियो। कार्यक्रम २ हजारभन्दा बढीले अवलोकन गरेका छन्। 

फेस्टमा २३ स्टार्टअपले आफ्नो आइडिया प्रस्तुत गरेका थिए। जसमध्ये इन्क्युवेसनका लागि ५ स्टार्टअप छनोट भएका छन् भने ब्ल्याक बोर्ड नेपाल प्रालि उत्कृष्ट स्टार्टअप हुन सफल भएको छ। ब्ल्याक बोर्ड नेपालसँगै पोथी इन्क्युबेटर, सार, स्मार्ट डस्टबिन, सस्तो किताब डटकम र मिझ्नी डटकम काठमाण्डौमा हुने इन्क्युवेसनका लागि छनोटमा परेका छन्। 

त्यस्तै साढे २ बजेदेखि सुरु भएको डिजिटल सुदूरपश्चिम संवादमा प्रमुख अतिथिका रुपमा प्रदेशका आन्तरिक मामिला तथा कानुनमन्त्री डा. रणबहादुर रावलको उपस्थिति थियो।

ह्वावे र इन्फोडेभलपर्सले प्रायोजन गरेको डिजिटल सुदूरपश्चिम संवादमा प्रदेशको डिजिटाइजेसनको अवस्था र आगामी दिनमा अख्तियार गर्नुपर्ने नीति तथा कार्ययोजनाका बारेमा छलफल भएको छ। 

ई–बीमाले मुख्य प्रायोजन गरेको स्टार्टअप एन्ड आइडिया फेस्टलाई यार्सा ल्याब्स, राष्ट्रिय वाणिज्य बैंक, प्रभु पे, सफ्वेरिका कलेज, निमा एकेडेमी, ब्रोडवे इन्फोसिस, डिशहोम फाइबरनेट, एसीसीए, सेलएप, सीएसआईटी एशोसिएसन नेपाल, नेपाल आन्ट्रप्रेनर्स हब, टेक्नोरियो, अप्लाई जब लगायतका विभिन्न संघसंस्थाको सहयोग रहेको छ।