काठमाण्डौ । ‘विश्व लगानीकर्ता सप्ताह २०२३’का अवसरमा धितोपत्र ब्रोकर्स एसोसिएसन नेपालको आयोजनामा आज सेयर बजार सचेतना कार्यक्रम गरिएको छ। 

कार्यक्रम काठमाण्डौको सरस्वतीनगरस्थित रिलायन्स कलेजमा आयोजना गरिएको हो। कार्यक्रमको उद्घाटन लगानीकर्ता दुर्गा तिवारी रिजालले गरेकी थिइन्। तिवारीले सबै विद्यार्थीलाई विशेषगरी महिलालाई सेयर बजारमा सहभागी हुन आग्रह गर्दै उनीहरुलाई आर्थिक रुपमा स्वतन्त्र हुन सुझाव दिइन्। 

कार्यक्रममा धितोपत्र ब्रोकर्स एसोसिएसनका अध्यक्ष सागर ढकालले विद्यार्थीलगायत सबैलाई स–सानो बचत गर्ने बानी बसाल्न र भविष्यका लागि लगानीमा ध्यान दिन आग्रह गरे। 

कार्यक्रममा सेयर बजार प्रशिक्षक सुवास भट्टराईले प्रभावकारी र रोचक तरिकाले २ घन्टा सेयर बजार सचेतना तथा प्रशिक्षण कार्यक्रम सञ्चालन गरेका थिए। 

कार्यक्रममा रिलायन्स कलेजका १५८ विद्यार्थी र १२  शिक्षकलगायत अन्य ब्रोकर कम्पनीहरुको उपस्थिति थियो।