काठमाण्डौ । मारवाडी सेवा समितिले १९औं एसियाली खेलकूद प्रतियोगितामा उत्कृष्ट प्रदर्शन गर्ने राष्ट्रिय खेलाडीहरुलाई नगदसहित सम्मान गरेको छ ।
समितिले क्रिकेटतर्फ दीपेन्द्रसिंह ऐरी र कुशल मल्ल र करातेतर्फ एरिका गुरुङलाई जनही १ लाख १ हजार नगदसहित सम्मान गरेको हो ।डेढ महिनाअघि चीनको हाङझाउमा सम्पन्न १९औं एसियाली खेलकुदमा दीपेन्द्र र कुशलले कीर्तिमानी प्रदर्शन गरेका थिए । उक्त प्रतियोगीतामा दीपेन्द्रले ९ बलमा अर्धशतक र कुशलले ३४ बलमा शतक प्रहार गरेका थिए।
एरिकाले करातेमा नेपाललाई रजत पदक दिलाएकी थिइन्। समितिका अध्यक्ष कैलाशचन्द्र गोयलले खेलाडीहरुलाई सम्मानपत्र प्रदान गरेका थिए ।
यसैगरी, समितिले दिपावली स्नेह मिलन समारोह आयोजना गरेको छ ।
सो अवसरमा समितिका अध्यक्ष गोयलले शुभ दीपावली, नेपाल सम्वत्, छठ पर्व २०८० को शुभकामना दिंदै समितिले सामाजिक, राजनैतिक, धार्मिक, शैक्षिक, साँस्कृतिक, आर्थिक एवं प्राकृतिक आपत विपत आदिमा सेवा गर्दै आएको बताए ।
उनले जाजरकोट र रुकुम पश्चिमा गएको विनाशकारी भूकम्पमा परी ठूलो जनधनको क्षती भएकोमा त्यस क्षेत्रमा मारवाडी सेवा समितिको तर्फबाट राहत पठाउने कार्य भइरहेको र पहिलो चरणमा फाइबरको सिरक ८३५ थान, पीफम मेट ९०० थान र दाल १ केजी र नुन १ केजी राखेर प्याक गरिएको ४०० प्याकेट चामल हस्तान्तरण गरिएको बताए ।
कार्यक्रममा नेपाल राष्ट्रिय मारवाडी परिषद्का अध्यक्ष पवन मित्तल, मारवाडी महिला मंचकी अध्यक्ष अर्चना काबरा, मारवाडी युवा मंचका अध्यक्ष शैलेन्द्र शर्मा,रमेश तापडि़यालगायतको उपस्थिति थियो ।
कार्यक्रम सञ्चालन समितिका महासचिव प्रमोद कुमार अग्रवालले गरेका थिए ।
