सबैभन्दा बढी आयकर तिर्ने आइएमई को–अपरेटिभ सम्मानित

काठमाण्डौ । आइएमई को–अपरेटिभ सर्भिस लिमिटेड आर्थिक वर्ष २०७६÷७७ मा नेपालका प्रारम्भिक सहकारी संस्थाहरूमध्ये सबैभन्दा बढी आयकर दाखिल गरेकोमा सम्मानित भएको छ। सहकारी विभागले ६४औँ सहकारी दिवसका अवसरमा आयोजित एक विशेष कार्यक्रमबीच आइएमई को–अपरेटिभलाई उक्त सम्मान प्रदान गरेको हो।

भूमि व्यवस्था सहकारी तथा गरिबी निवारण मन्त्री माननीय डा. शिवमाया तुम्बाहाङ्फेले संस्थाका तर्फबाट अध्यक्ष योगेश्वर शर्मा ढकाललाई उक्त सम्मान प्रदान गरिन्। सम्मान ग्रहण कार्यक्रममा आइएमई को–अपरेटिभ सर्भिस लिमिटेडका प्रमुख कार्यकारी अधिकृत अर्जुन शर्मा पौडेल एवं बोर्ड सचिव सागर ढकालको उपस्थिति थियो। 

सम्मान ग्रहणपछि संक्षिप्त मन्तब्य दिँदै अध्यक्ष ढकालले सरकारले सहकारीलाई आर्थिक क्षेत्रको एक मुख्य आधार स्तम्भका रुपमा स्वीकार गर्दै आइरहेको सन्दर्भमा आफ्नो संस्थाले करमार्फत समग्र सहकारी उद्योगमै सबैभन्दा बढी आयकर दाखिल गरी राज्यलाई सहयोग गर्न पाएकोमा प्रशन्नता व्यक्त गरे। संस्थाका सम्पूर्ण सेयरधनी एवम् कर्मचारीलाई यो सफलताको मुख्य श्रेय दिँदै अध्यक्ष ढकालले आगामी दिनमा संस्थाले आफ्नो पहिचानलाई अझै बढाउँदै लैजाने प्रतिबद्धता गरे। 

काठमाण्डौको कान्तिपथमा केन्द्रीय कार्यालय रहेको आइएमई को–अपरेटिभ सर्भिस लिमिटेडले देशभरका १५ वटा शाखामार्फत सहकारी सेवा प्रदान गर्दै आइरहेको छ।