काठमाण्डौ । काठमाण्डौमा स्टार्टअप एन्ड आइडिया फेस्ट सुरु भएको छ। बानेश्वरको थापागाउँस्थित बानेश्वर बैंक्वेटमा दुईदिने स्टार्टअप एन्ड आइडिया फेस्ट सुरु भएको हो। 

लिभिङ विथ आईसीटीको मुख्य आयोजनामा भइरहेको फेस्टमा सातै प्रदेशका स्टार्टअपसहित ८० बढी डिजिटल स्टार्टअप र इन्नोभेसनहरुको सहभागीता रहेको छ। 

फेस्टको उद्घाटनसत्रमा प्रमुख अतिथिका रुपमा शिक्षा, विज्ञान तथा प्रविधि मन्त्रालयकी विज्ञान प्रविधि सचिव प्रमिला देवी बज्राचार्यको उपस्थिति थियो। विशिष्ट अतिथिमा पूर्वविज्ञान तथा प्रविधिमन्त्री गणेश शाहको उपस्थिति थियो भने अतिथिका रुपमा सञ्चार तथा सूचना प्रविधि मन्त्रालयका पूर्वसहसचिव वीरेन्द्र मिश्र, स्क्वाइड अफ चेन्ज मेकर्सका सहसंस्थापक सुशील भट्टराई, आईसीटी विज्ञ हेमपाल श्रेष्ठलगायतको स्टार्टअप तथा इन्नोभेसनमा रुचि राख्नेहरुको उपस्थिति थियो। 

उद्घाटन कार्यक्रममा लिभिङ विथ आईसीटीका अध्यक्ष राजन लम्सालले देशैभरका स्टार्टअप तथा इन्नोभेसनलाई प्रवर्द्धधन र प्रोत्साहन गर्न स्टार्टअप एन्ड आइडिया फेस्ट आयोजना गरेको बताए। 

त्यसैगरी प्रमुख अतिथि बज्राचार्यले युवाहरुको स्टार्टअप तथा आइडियालाई प्रवर्द्धन गर्न फेस्ट महत्वपूर्ण प्लेटफर्म भएको बताइन्। ‘ब्रेड ड्रेन भइरहेको अवस्थामा देशभित्रै केही गर्न चाहने युवाका लागि स्टार्टअप एन्ड आइडिया फेस्ट राम्रो प्लेटफर्म हो’, उनले भनिन्, ‘त्यसकारण सबैले फेस्ट अवलोकन गरेर देशमै केही गर्ने हुटहुटी बोकेका युवाको उत्साह बढाउन आग्रह गर्दछु।’

शुक्रबार र शनिबार सञ्चालन हुने फेस्ट बिहान ११ बजेदेखि ५ बजेसम्म निःशुल्क अवलोकन गर्न सकिने छ। कार्यक्रममा बिहानैदेखि स्कुल, कलेजका विद्यार्थीसँगै स्टार्टअप तथा इन्नोभेसनमा रुचि राख्ने युवाको उत्साहजनक सहभागिता छ। 

आईसीटी अवार्ड २०२३ को प्रि–इभेन्ट क्याम्पियनका रुपमा हुने स्टार्टअप एन्ड आइडिया फेस्ट तथा स्टिम क्याम्पमा द स्क्वाइड अफ चेन्जमेकरको सहकार्य रहेको छ। कार्यक्रमको मुख्य आकर्षणका रुपमा नयाँ नयाँ आइडिया, इन्नोभेसन तथा प्रडक्टको प्रदर्शनी, आइडिया पिचिङ, एष्ट्रोनोमी क्याम्प, रकेट तथा रोबोटिक्स क्याम्प, लगानीको अवसर, गेम र आकर्षक पुरस्कारको समेत व्यवस्था रहेको छ। 

यसबाहेक कार्यक्रममा स्याटेलाईट वर्कसप, एस्ट्रोनिमो वर्कसप, एभिसयन वर्कसप र रकेट साइन्स वर्कस्पसमेत सञ्चालन भइरहेको छ।  

फेस्टमा सातै प्रदेशका ३० बढी स्टार्टअपका साथै आईसीटी अवार्ड २०२३ मा प्रतिस्पर्धाबाट छनौट भएका उत्कृष्ट १२ स्टार्टअप, प्रडक्ट र इन्नोभेसनहरुले समेत फेस्टमा आफ्ना आइडिया र प्रडक्टहरु प्रदर्शनीमा छन्। 

कार्यक्रममा स्क्वाइड अफ चेन्जमेकरले रोबोट, रकेट, थ्रीडी प्रिन्टङसहित बालबालिकाले बनाएका नयाँ प्रोजेक्टहरुलाई पनि प्रर्दशनीमा राखेको छ। अवलोकनकर्ताले आईसिटी अवार्ड २०२३ का उत्कृष्ट १२ स्टार्टअप र प्रडक्ट र राइजिङ स्टार इन्नोभेसनलाई भोट पनि गर्न सक्नेछन्। 

नेपालको प्रतिष्ठित प्रविधि अवार्डका रुपमा परिचित आईसीटी अवार्डको आठौँ संस्करणमा यसपटक विभिन्न १३ विधामा ५०० बढीको नोमिनेसन प्राप्त भएको थियो। हाल आईसीटी अवार्ड २०२३ को नोमिनेसन र छनौट प्रक्रिया सञ्चालनमा रहेको छ।

यसपटक आईसिटी अवार्डको ग्रान्ड फिनालेमा सातै प्रदेशका उत्कृष्ट एक–एक स्टार्टअपलाई प्रोभिसियल रिकग्निसन अवार्डसमेत प्रदान गरिने छ। आईसीटी अवार्डको ग्रान्ड फिनाले आगामी पुस ६ गते द सोल्टी काठमाण्डौमा आयोजना हुनेछ। 

स्टार्टअप एन्ड आइडिया फेस्ट र स्टिम क्याम्पसँगै अवार्डका लागि दर्जनौँ प्रि–इभेन्ट सञ्चालन हुनेछन्। कान्तिपुर टेलिभिजनले २ महिनासम्म स्टार्टअप र आइडिया पिचिङको विशेष कार्यक्रमका रुपमा टेलिभिजन सिरिजहरु पनि प्रशारण गर्नेछ।