चितवन । सूर्या लाइफ इन्स्योरेन्स कम्पनी लिमिटेडले दुई दिने एनुअल रिकग्निसन प्रोग्राम सम्पन्न गरेको छ। 

कम्पनीका प्रमुख कार्यकारी अधिकृत (सिइओ) पवनकुमार खड्काले कार्यक्रमको उद्घाटन गरेका थिए। कार्यक्रममा सूर्या लाइफ इन्स्योरेन्स कम्पनीसँग सम्बन्धित १५० भन्दा बढी अभिकर्ता र कर्मचारी सहभागी थिए। 

चितवनको सौराहामा असोज १ गते देखि २ गते सम्पन्न  कार्यक्रममा गत आर्थिक वर्षमा देशैभरिमा सबैभन्दा बढी प्रिमियम संकलन गर्ने (व्यक्तिगत व्यवसाय) तीनजनालाई एजेन्सी अचिभमेन्ट अवार्डबाट सम्मानित गरिएको थियो। यसरी सम्मानित हुनेमा बुटवल शाखाका कमलप्रसाद घिमिरेलाई सीईओ खड्काले अवार्डसहित सम्मानित गरे। सोही विधामा ललितपुर शाखाका पदमबहादुर फागो र विमला राई फस्ट रनर अप र सेकेन्ड रनअप घोषित भए। 

त्यस्तै गत आर्थिक वर्षमा सबैभन्दा बढी प्रिमियम संकलन गर्ने (सामूहिक व्यवसाय) अभिकर्ताहरुलाई एजेन्सी म्यानेजर अचिभमेन्ट अवार्डबाट सम्मानित गरिएको थियो। यस विधामा ललितपुर शाखाका उपिन्द्र राई विजेता घोषित भए भने कमलप्रसाद घिमिरे (बुटवल) र भक्तबहादुर राई (जोरपाटी) फस्ट रनर अप र सेकेन्ड रनअप घोषित भए। 

त्यस्तै देशैभरि रहेका शाखामा उत्कृष्ट शाखाका रुपमा काठमाण्डौ शाखा पुरस्कृत भएको थियो भने बुटवल र ललितपुर क्रमशः फस्ट रनर अप र सेकेन्ड रनअप घोषित भएका थिए। 

कम्पनीले देशैभरका सात प्रदेशबाट उत्कृष्ट व्यावसाय गर्ने प्रदेशलाई ‘बेस्ट रिजन अवार्ड’को ‘रनिङ शिल्ड’ यसपटक बागमती प्रदेशले हात पारेको थियो। उक्त अवसरमा विभिन्न १२ विधाका साथै अन्य गरी ४६ जनालाई कम्पनीले ट्रफीसहित सम्मान गरेको थियो। 

दुई विधाबाट पुरस्कृत भएका बुटवल शाखाका कमलप्रसाद घिमिरेले कम्पनीले आफ्नो कामप्रतिको लगावलाई पहिचान गरी सम्मानित गरेकोमा अझै काम गर्ने प्रेरणा मिलेको बताए। उनले भने, ‘अन्तर्राष्ट्रिय स्तरको कार्यक्रम आयोजना गरी सम्मानित गरेकोमा संस्थाप्रति कृतज्ञ छु र ज्यादै गौरवान्वित भएको छु, आउँदा दिनमा अझै काम गर्ने प्रेरणा थपिएको छ।’

त्यस्तै उपेन्द्र राईले कर्मचारी र अभिकर्ताहरुको सहकार्यबाट नै कम्पनीलाई उत्कृष्ट कम्पनी बनाउन सकिने बताए। उनले भने, ‘कर्मचारी र अभिकर्ताहरुको हातेमालोबाट नै अगाडि बढ्न सकिन्छ, जसले गर्दा कम्पनीले लक्ष्य हासिल गर्नका लागि धेरै समय कुर्नु नै पर्दैन।’ 

उनलेसबै अभिकर्ता, कर्मचारी र व्यवस्थापनको सहकार्यले सूर्यालाइफ निकट भविष्यमै देशको नम्बर एक कम्पनी बन्ने पनि दाबी गरे। 

त्यस्तै अभिकर्ता संघका अध्यक्षसमेत रहेका अर्का विजेता रामबहादुर तामाङले यस किसिमको सम्मानले अभिकर्ताहरुमा हौसला बढ्ने बताउँदै कम्पनीले देशैभरका अभिकर्ताहरुलाई सम्मानित गर्नुपर्ने बताए। उनले भने, ‘अभिकर्ताहरुलाई गरिने यस किसिमको सम्मानले अझै बढी काममा लाग्ने इच्छाशक्ति प्रकट हुन्छ।’

यसका साथै कार्यक्रममा पुरस्कृतहरुलाई सीइओ खड्काले बधाइ तथा शुभकामना दिँदै आगामी दिनहरुमा अन्य एजेन्सी म्यानेजर, अभिकर्ता एवं कर्मचारीहरुले अझै उत्कृष्ट काम गर्ने अपेक्षा आफूले लिएको समेत बताए। उनलेसहकार्य, साथ र विश्वास नै कम्पनीको मूलमन्त्र भएको उल्लेख गर्दै आगामी दिनमा अभिकर्ता र कर्मचारीहरुले अझै बढी सकारात्मक ऊर्जाका साथ विश्वसनीय ढंगले काम गर्न पनि आग्रह गरे। 

यस कार्यक्रम सफलतापूर्वक सम्पन्न भएकोमा खुशी व्यक्त गर्दै खड्काले आगामी दिनमा कम्पनीलाई मुलुकै सबैभन्दा उत्कृष्ट कम्पनी बनाउने व्यवस्थापनको लक्ष्य पूरा गर्ने अभियानमा मेरुदण्डका रुपमा अभिकर्ता र कर्मचारी नै भएकोले बताए। उनले त्यसका लागि सबैजना प्रतिबद्ध रहेको आभाष आफूले यस कार्यक्रमपछि पाएको पनि बताए।