काठमाण्डौ। विगत एक महिनादेखि नेपालमा सञ्चालनमा रहेको ‘सेल्फी विथ डटर’ अभियान बुधबार एक विशेष भर्चुअल कार्यक्रम आयोजना गर्दै सम्पन्न भएको छ। 

‘सेल्फी विथ डटर’ दिवसका रुपमा नेपाल र भारतमा संयुक्त रुपमा यो कार्यक्रम आयोजना गरिएको थियो। 

विगत केही वर्षदेखि नेपालको सामाजिक, प्राविधिक र अनुसन्धानको क्षेत्रमा काम गर्दै आइरहेको संस्था नेपाल इन्टरनेट फाउन्डेसनले भारतीय अभियन्ता सुनिल जागलनसँगको सहकार्यमा महिला सशक्तीकरण तथा लैंगिक समानताको मूल मर्मसहित यो कार्यक्रम नेपालमा पनि सञ्चालन गरियो। 

नेपालमा सञ्चालित एक महिनाको अभियानमा हजारौँ संख्यामा छोरीसँग सेल्फी पठाएका थिए। यस अभियानमा प्रतिभा घिसिङ र उनकी छोरी प्रतिष्ठा लामाको सेल्फीले प्रथम पुरस्कार प्राप्त गरेको छ। यसैगरी दक्षबहादुर राई र मोती सारासँग नातिनी निशुदिका राईको सेल्फीले दोस्रो स्थान प्राप्त गरेको छ भने यमुना प्रसाई र श्रेया पौडेलको सेल्फीले तेस्रो स्थान प्राप्त गरेको छ। 

विजेतालाई ट्रफी र प्रमाणपत्रका साथ क्रमशः २१ हजार, ११ हजार र ५ हजार १०० रुपैयाँ को पुरस्कार प्रदान गरिएको छ। 

समापन कार्यक्रममा भारतका युनियन मिनिस्टर अफ स्टेट रावो इन्द्रजित सिंह मुख्य अतिथिका रुपमा उपस्थिति रहेको थियो। कार्यक्रमलाई सम्बोधन गर्दै सिंहले भारतमा सामाजिक चेतना बढाउन ‘सेल्फी विथ डटर’ अभियानले सकारात्मक प्रभाब पारेको बताए। उने नेपाल र भारत देशमा अझै पनि छोरीलाई हेला गर्ने र छोराभन्दा फरक व्यवहार गर्ने गरेको हुँदा यसलाई निर्मूल गर्न प्रविधिमार्फत सामाजिक चेतना विकास गर्न यस्ता अभियानहरु चलाउनुपर्नेमा जोड दिए। ‘यो अभियानले छोरी र महिलालाई मात्र सामाजिक रुपले मजबुतमात्र बनाएको छैन, छोरीहरूको समाजमा सम्मान दिने अभियानले जनआन्दोलनको रूप पनि लिएको छ’, उनले भने।

कार्यक्रममा नेपाल सरकारकी पूर्वमहिला बालबालिका तथा ज्येष्ठ नागरिकमन्त्री जुलीकुमारी महतोले नेपालजस्तो कम विकसित मुलुकमा अझै पनि छोराछोरीमा भेदभाव रहेको, दाइजोलगायतका सामाजिक कुरीतिले समस्या ल्याएको र सेल्फी विथ डटर अभियान नेपालमा यतिको प्रचलित र चाँडै वायरल भएको कुनै पनि अभियान नै नरहेको बताइन्। ‘छिमेकी देश भारतबाट सुरु भएको छोरीहरुप्रति सम्मानको सामाजिक क्रान्ति नेपालमा पनि द्रुत गतिमा अघि बढिरहेको छ’, उनले भने, ‘यो अभियानले सामाजिक चेतना विकास गर्न सघाउ पुर्याउनेछ।’

कार्यक्रममा भारत सरकार इलेक्ट्रोनिक्स तथा आईटी मन्त्रालयअन्तर्गत राष्ट्रिय इ–गभर्नेन्स महाशाखा प्रमुख अभिशेख सिंहले भारतमा प्रविधि र प्रविधिसम्बन्धी यस्ता अभियानले सामाजिक जीवनशैली सुधार्न र भेदभाव हटाउन सहयोग गरेको बताए। सिंहले भने, ‘ प्रधानमन्त्री नरेन्द्र मोदीबाट प्रचारित सेल्फी विथ डटर अभियान आज एक विश्वव्यापी आन्दोलनका रूप लिँदैछन्। यो सम्पूर्ण भारत र नेपालका लागि गौरवको कुरा हो।’

नेपालमा पनि यस किसिमको आभियानले छोरीलाई लैंगिक समानताको हिसाबले हेर्न र सोही किसिमले व्यवहार गर्न प्रोत्साहित गरेको नेपाल इन्टरनेट फाउन्डेसनका अध्यक्ष बिक्रम श्रेष्ठले बताए।

नेपालमा कार्यक्रम संयोजक कल्पना श्रेष्ठले, ‘यो कार्यक्रममा सहभागीले बनाएका सामाजिक भिडियो सन्देशले छोरीलाइ हेला गर्ने समाजमा केही हदसम्म रुपान्तरण गरिरहेको पाएका छौँ।’

सेल्फी विथ डटर अभियान र फाउन्डेशनका संस्थापक सुनील जगलानका अनुसार यो अभियान हरियाणाबाट सुरु गरिएको हो। ‘यस अभियानलाई नेपालका जनताले धेरै मन पराएको र यो अभियानले महिला सशक्तीकरणका लागि नयाँ आयाम स्थापित गर्ने हाम्रो विश्वास छ’, उनले भने।