काठमाण्डौ। प्रविधि बजार अध्ययन फर्म क्यानालिसले गरेको माग र ढुवानीका अध्ययनअनुसार उदयमान प्रविधि कम्पनी रियलमी विश्वका प्रमुख १८ वटा बजारमा शीर्ष ५ स्मार्टफोन ब्राण्डभित्र पर्न सफल भएको छ। 

स्थापनाको केवल ३७ महिनामै रियलमीले विश्वभर १० करोड स्मार्टफोन ढुवानीको लक्ष्य पूरा गरी स्मार्टफोनको क्षेत्रमा तीव्र बजार विस्तार गरेर नयाँ रेकर्ड बनाएको छ। यो ३ वर्षीय कम्पनीका लागि नयाँ रेकर्ड हो। 

यसैगरी भारतको नम्बर वन फाइभजी स्मार्टफोन ब्राण्डका रुपमा आफूलाई स्थापित गरी भारतमा ५ करोड स्मार्टफोन ढुवानी गर्ने पहिलो स्मार्टफोन रियलमी बनेको छ। यो स्मार्टफोन क्षेत्रकै नयाँ उपलब्धि हो। 

फाइभजी विस्तारका क्षेत्रमा आक्रामक रियलमीे २०२१ को दोस्रो क्वाटरमा भारतीय स्मार्टफोन बजारको क्षेत्रमा २२ प्रतिशत हिस्सा ओगटेको छ। उक्त अवधिमा १४० प्रतिशतले बजार विस्तार गर्दै रियलमी भारतको चौथो ठूलो स्मार्टफोन बन्न सफल भएको छ। 

क्यानालिसको विश्वभर स्मार्टफोन ढुवानीको रिपोर्टअनुसार फिलिपिन्स बजारमा रियलमी पहिलो नम्बरमा रहेको छ। त्यसैगरी बंगलादेशमा पनि रियलमीले पहिलोपटक नेतृत्वदायी स्थानमा आफूलाई उभाएको छ। जुन स्थान हासिल गर्न सन् २०२० मा बजार प्रवेश गरेलगत्तै सुरुआती केवल ५ क्वाटर  समय लगाएको हो।  

यो क्वाटर युरोपको बजारमा सफलता प्राप्त गर्न रियलमीका लागि उपयुक्त समय रह्यो। किनभने १२८२% वार्षिक बजार वृद्धि गर्दै ढुवानीका हिसाबले युरोपमा स्मार्टफोन पठाउने शीर्ष ५ भित्र रियलमी पर्न सफल भएको छ।  

यसका साथै यो कम्पनी पहिलोपटक स्लोभियामा दोस्रो, रसिया र पोल्याण्डमा तेस्रो र इटलीमा पाँचौँ स्थानमा पर्न सफल भएको छ।  ‘यही अगस्ट महिनामा हामीले कम्पनीको तेस्रो वार्षिकोत्सव मनाउदै गर्दा विश्वभर स्मार्टफोन बजारमा बलियो स्थानमा आफूलाई स्थापित गरेकोमा हामी खुसी छौँ’, रियलमीका उपाध्यक्षसमेत रहेका नेपाल, भारत तथा यूरोपका लागि प्रमुख कार्यकारी अधिकृत माधव शेठले भने, ‘चुनौतीका साथ हामी हाम्रा उपभोक्तालाई सुलभ मूल्यमा उच्चस्तरको स्टाइलिस स्मार्टफोन उपलब्ध गराउनमा प्रतिबद्ध छौँ।’

क्यानालिस रिपोर्टका अनुसार ढुवानीका हिसाबले फिलिपिन्स, बंगलादेश, स्लोभेनिया, पोल्याण्ड, रसिया, कम्बोडिया, चेक रिपब्लिक, भारत, इन्डोनेसिया, इजिप्ट, ग्रिस, इजरायल, इटली, मलेसिया, म्यानमार, नेपाल, सिंगापुर र थाइल्याण्डमा शीर्ष ५ स्थानभित्र रियलमी रहेको छ।