काठमाण्डौ। नेपाल क्रेडिट एण्ड कमर्स (एनसीसी) बैंक लिमिटेडले काठमाण्डौको ढल्कोमा सञ्चालित विद्युतीय रिक्सा चालकहरूलाई क्यूआर कोड हस्तान्तरण गरेको छ। 

बैंकद्वारा बुधबार आयोजित कार्यक्रमका बीच नेपाल राष्ट्र बैंकका कार्यकारी निर्देशक भुवन कँडेलले रिक्सा चालकहरु लाई क्यूआर कोड हस्तान्तरण गरेका हुन्। क्यूआर कोडमार्फत विद्युतीय भुक्तानीलाई प्रवर्द्धन गर्ने राष्ट्र बैंकको नीतिअनुसार एनसीसी बैंकले विद्युतीय रिक्सा चालकहरूलाई क्यूआर कोड हस्तान्तरण गरेको हो। त्यसका लागि बैंकले श्रमिक नेपाल यातायात अटो प्रालिसँग सहकार्य गरेको छ।  

कार्यक्रममा नेपाल राष्ट्र बैकका कार्यकारी निर्देशक कडेलले विद्युतीय भुक्तानी अहिलेको आवश्यकता बनिसकेको बताए। उनले भने, ‘स्वस्थ र पारदर्शी बैंकिङ कारोबारमा पनि यसले सघाउ पुर्याउने छ।’ 

प्रदूषणमुक्त सवारी अटो रिक्सामा प्रदूषणमुक्त भुक्तानी सुरुआत भएको कँडेलको भनाइ छ।  यस प्रकारका कार्यक्रमले देशको समग्र सुशासनमा समेत सकारात्मक प्रभाव पर्ने उनले बताए। 

एनसीसी बैंकका प्रमुख कार्यकारी अधिकृत (सीईओ) रमेशराज अर्यालले सवारी साधनमा क्यूआर कोड राख्दा ग्राहकले नगद बोक्ने झन्झट नहुने बताए। उनले भने, ‘ग्राहकले तिरेको पैसा एनसीसी बैकमा जम्मा हुन्छ। त्यो पैसा एकातिर सुरक्षित हुन्छ भने अर्कोतिर व्याज समेत आउँछ।’ 

अर्यालले क्यूआर कोडको प्रयोग व्यापक बन्दै गएको र भोलिका दिनमा रिक्सा चालकले पानीका बोतल किन्नदेखि तरकारी किन्नसमेत क्यूआर कोडको सहायता लिनसक्ने बताए। चालकहरूलाई बिना धितो ऋण दिन पनि एनसीसी बैंक तयार रहेको उनले घोषणा गरे। 

काठमाण्डौ महानगरपालिका १७ नम्बर वडाका वडाध्यक्ष नवीन मानन्धरले चालकहरू आफ्नो अनुशासनमा रहनुपर्ने र सम्बन्धित निकायले पनि चालकको गन्तव्य क्षेत्र विस्तार गर्नुपर्ने बताए। उनले हाल १५० को संख्यामा ढल्कुमा विद्युतीय रिक्सा सञ्चालनमा रहेको बताए। 

श्रमिक नेपाल यातायात अटो प्रालिका अध्यक्ष डम्बर रानाका अनुसार पाईडलबाट सुरु गरेका व्यवसायी अटो रिक्सामा प्रवेश हुँदासम्म कुनै निकायको सहयोग नपाएको बताए। उनले एनसीसी बैंक आफूहरूको सहयोगी बनेर आएको धारणा राखे। ‘पाइडल मारेर रिक्सा चलाउनुपर्ने चालक आज विद्युतीय रिक्सासम्म बल्ल–बल्ल आइपुगेका छन्। कुनै पनि वित्तीय संस्थाको सहयोग चालकहरूलाई भएको थिएन’, उनले भने, ‘अहिले एनसीसी बैंकको सहयोग पाएका छौँ। हामीले स्वदेशमा उत्पादन हुने बिजुली प्रयोग गरी प्रदूषणमुक्त रिक्सा चलाएका छौँ। यसलाई पर्यटन क्षेत्रमा आबद्ध गराउन जरुरी छ।’ 

नेपाल ट्रेड युनियन महासंघका सचिव सोम तामाङ्ले श्रमिक वर्गलाई लक्षित गरी एनसीसी बैंकको क्यूआर कोड कार्यक्रम ल्याइएकाले यसबाट चालक र ग्राहक दुवै लाभान्वित हुने बताए। 

देशैभर शाखा सञ्जाल फैलिएको एनसीसी बैंकका ७ वटै प्रदेशमा गरी कुल १२८ शाखा सञ्चालनमा रहेका छन् भने ८ वटा एक्सटेन्सन काउन्टर संचालित छन्। यस्तै देशभर जम्मा १०७ वटा एटीएम सञ्चालन गरी बैँकले आफ्ना ग्राहकलाई स्तरीय सेवा प्रदान गरिरहेको छ।