काठमाण्डौ । विश्व महामारी कोरोनाभाइरसबाट बुधबार बिहानसम्म अमेरिकामा संक्रमित हुनेको संख्या १० लाख नाघेको छ।

जोन्स हप्किन्स विश्वविद्यालयका अनुसार विश्वभर संक्रमितमध्ये करिब एक तिहाइ संक्रमित अमेरिकामा रहेका छन्। अमेरिकामा रहेका संक्रमितमध्ये हालसम्म ५७ हजारभन्दा बढीको मृत्यु भइसकेको छ। 

हालसम्म विश्वभर कुल ३० लाख ९८ हजारभन्दा बढी संक्रमित भएका छन्। तीमध्ये २ लाख १६ हजारभन्दा बढीको ज्यान गइसकेको छ। 

अमेरिकी राष्ट्रपति डोनल्ड ट्रम्पले आफूहरूले धेरैभन्दा धेरै परीक्षण गरेकाले यो संख्या देखिएको दाबी गरेका छन्। उनले विस्तारै संक्रमितको संख्या शून्यमा झर्ने बताए। 

त्यसो त ट्रम्पले गत फेब्रुअरीमा पनि अमेरिकामा कोरोना संक्रमण शून्य हुने बताएका थिए। त्यसबेला अमेरिकामा कोरोनाबाट १५ जनामात्र संक्रमित भएका थिए।