काठमाण्डौ । एसियन लाइफ इन्स्योरेन्स कम्पनी लिमिटेडले आर्थिक वर्ष २०७६/७७ का लागि प्रस्ताव गरेको लाभांश सुरक्षित गर्ने आज माघ ११ गते अन्तिम मौका रहेको छ। 

कम्पनीले लाभांश र वार्षिक साधारणसभा प्रयोजनका लागि भोलि माघ १२ गते बुक क्लोज गर्ने निर्णय गरेको छ। यसको अर्थ आज माघ ११ गतेसम्म कायम सेयरधनीहरुमात्रै यो कम्पनीको लाभांश पाउन र सभामा भाग लिन योग्य हुनेछन्। 

कम्पनीले आफ्नो आफ्नो १३ औँ वार्षिक साधारणसभा यही माघ २१ गते आयोजना गर्ने निर्णय गरेको छ। सोही सभाले आर्थिक वर्ष २०७६/७७ का लागि प्रस्तावित कुल २७ प्रतिशत लाभांश अनुमोदन गर्नेछ। जसमा २५ प्रतिशत बोनस सेयर र कर प्रयोजनार्थ २ प्रतिशत नगद लाभांश छन्।

सभाले बोनस सेयर जारीपश्चातको हदसम्म जारी तथा चुक्ता पुँजी वृद्धि गर्न स्वीकृति गर्ने विशेष प्रस्ताव पनि अनुमोदन गर्नेछ।

सभाले एसियन लाइफको ५१ प्रतिशत स्वामित्व रहेको एसियन क्यापिटल लिमिटेडमा सामूहिक लगानी कोष सञ्चालन गर्न सम्बन्धित नियामक निकायबाट स्वीकृति लिने तथा सोको कार्यान्वयन गर्न सञ्चालक समितिलाई अख्तियारी दिने प्रस्ताव पारित गर्नेछ।

सभामा आर्थिक वर्ष आर्थिक वर्ष २०७६/७७ को वार्षिक प्रतिवेदन, लेखापरीक्षकको प्रतिवेदनलगायतका महत्वपूर्ण दस्तावेजहरु छलफल गरी पारित गरिनेछ।