आज थपिए ४२६ कोरोना संक्रमित, २१६ जना निको भए

काठमाण्डौ। नेपालमा बितेको २४ घन्टाको अवधिमा थप ४२६ जनामा कोरोना संक्रमण पुष्टि भएको छ।

शुक्रबारको नियमित प्रेस ब्रिफिङका क्रममा स्वास्थ्य मन्त्रालयका प्रवक्ता डा जागेश्वर गौतमले बितेको २४ घन्टामा ८ जना महिला र ३३ जना पुरुषमा कोरोना संक्रमण पुष्टि भएको बताएका हुन्। योसँगै नेपालमा कोरोना संक्रमितको संख्या ८ हजार २७४ पुगेको छ। तीमध्ये ७०७ जना महिला र ७ हजार ५६७ जना पुरुष छन्। 

यो अवधिमा कोरोना संक्रमण ठिक भएर फर्किनेको संख्या २१६ रहेको छ। जसमा ९ महिला र बाँकी पुरुष छन्। योसँग ठिक हुनेको संख्या १ हजार ४०२ पुगेको छ। 

पछिल्लो २४ घन्टामा ४ हजार २३१ जनाको पीसीआर विधिबाट कोरोना परीक्षण गरिएको गौतमले जानकारी दिए। योसँगै पीसीआर परीक्षण विधिबाट कोरोना संक्रमण जाँच गर्नेको संख्या १ लाख ६१ हजार ७४९ पुगेको छ। 
त्यस्तै आरडीटी विधिबाट बितेको २४ घन्टामा ४ हजार ३९९ जनाको कोरोना परीक्षण गरिएको छ। योसँगै आरडीटी जाँच गर्नेको संख्या २ लाख ४७ हजार ८७४ पुगेको छ। 

देशभरका विभिन्न स्थानमा रहेका क्वारेन्टाइनमा १ लाख ९ हजार ४६१ जना रहेको गौतमले जानकारी दिए। उनका अनुसार ६ हजार ८५० जना विभिन्न अस्पतालका आइसोलेसनमा उपचाररत छन्।

हालसम्म नेपालमा कोरोना संक्रमणबाट २२ जनाको मृत्यु भएको छ।