काठमाण्डौ । विश्व स्वास्थ्य संगठन (डब्ल्यूएचओ) ले केही मिनेटभित्रै कोभिड-१९ पत्ता लगाउने एउटा परीक्षणले न्यून र मध्यम आय भएका मुलुकमा कोरोनाभाइरस पत्ता लगाउने कार्यक्षमतालाई उच्च रूपमा विस्तार गर्ने जनाएका छ।

स्वास्थ्यकर्मी र प्रयोगशाला कम भएका अल्पविकसित मुलुकमा कोभिड-१९ पत्ता लगाउने प्रक्रियामा पाँच डलरमात्र लागत पर्ने उक्त परीक्षण प्रविधिले सकारात्मक परिवर्तन ल्याउने ठानिएको छ। उत्पादकहरूसँगको एउटा सम्झौताअनुसार उनीहरूले ६ महिनाभित्र १२ करोडवटा त्यस्ता परीक्षण उपलब्ध गराउनेछन्।

डब्ल्यूएचओले यो कोरोनाभाइरस नियन्त्रणका लागि कोसेढुंगा साबित हुने जनाएको छ। परीक्षणका लागि नमुना दिएपछि त्यसको नतिजा आउन लामो समय लाग्दा धेरै देशमा कोरोनाभाइरस फैलिन नदिन गाह्रो हुने गरेको छ।

विज्ञहरूले भारत र मेक्सिकोजस्ता उच्च सङ्क्रमण दर भएका देशमा एकदमै थोरैमात्र परीक्षण हुँदा महामारीको वास्तविक विस्तार थाहा हुन नसकेको बताएका छन्।

डब्ल्यूएचओका महानिर्देशक डा. टेड्रोस एड्हानोम गेहब्रेयससले सोमबर आयोजित पत्रकार सम्मेलनमा भने,'नयाँ, सजिलै बोकेर हिँड्न सकिने र प्रयोग गर्न सजिलो परीक्षणले कैयौँ घन्टा वा दिनको साटो १५ देखि ३० मिनेटभित्र नतिजा दिन्छ।'

औषधि निर्माताहरू एब्बो र एसडी बायोसेन्सरले च्यारिटेबल संस्था बिल एन्ड मेलिन्डा गेट्स फाउन्डेसनका लागि १२ करोड परीक्षणहरू उत्पादन गर्न सहमत बनेको टेड्रोसले बताए। 

सम्झौताले १३३ देशमा सहायता पुग्नेछ। त्यसमा हाल महामारीले धेरै असर पारेका र मृत्यु भएका ल्याटिन अमेरिकी मुलुक पनि छन्। 'यो उनीहरूको परीक्षण क्षमताको प्रमुख अतिरिक्त क्षमता हो र यो विशेषगरी उच्च सङ्क्रमण भएका क्षेत्रमा महत्त्वपूर्ण हुनेछ', टेड्रोसले भने, 'यसले प्रयोगशालाको सुविधा र पर्याप्त स्वास्थ्यकर्मी नभएका क्षेत्रमा परीक्षणको दायरा बढाउनेछ।' – बीबीसीबाट