आर्थिक संकटको चपेटामा त्रिवि, साउनयता पेन्सन खुवाउन सकेन

काठमाण्डौ । सरकारले पर्याप्त बजेट उपलब्ध नगराउँदा मुलुकको पहिलो विश्वविद्यालयले आर्थिक अभाव व्यहोर्नुपरेको छ।

पर्याप्त बजेट नहुँदा त्रिभुवन विश्वविद्यालयले अवकाशप्राप्त प्राध्यापक र कर्मचारीलाई साउनयता पेन्सन पठाउन सकेको छैन। विश्वविद्यालय अलुम्नाई एसोसिएसनको चौथो राष्ट्रिय सम्मेलनको उद्घाटनमा बोल्दै विश्वविद्यालयका रजिस्ट्रार प्राडा पेसल दाहालले पेन्सन खुवाउन नसकिएको बताए।

विश्वविद्यालयले गत आर्थिक वर्षमा रु. २८ अर्ब बजेट विश्वविद्यालयसभाबाट पारित गरेको थियो भने सरकारले रु. ९ अर्ब बजेट दिएको थियो।

विश्वविद्यालयले रु. १० अर्ब तलब र भत्ता तथा रु. ४ अर्ब पेन्सनमा खर्च गर्दै आएको रजिस्ट्रार दाहालले बताए।

विश्वविद्यालयका उपकुलपति प्राडा धर्मकान्त बास्कोटाले विश्वविद्यालयमा १६ हजार ६५ जना शिक्षक र कर्मचारीको दरबन्दी रहेकोमा सरकारले १३ हजारजनाका लागिमात्रै तलब भत्ता पठाउने गरेको बताए।

- RSS

 

---