काठमाण्डौ । नेपालको पहिलो र अग्रणी भुक्तानी सेवा प्रदायक इसेवामार्फत स्कुल तथा कलेजको शैक्षिक शुल्क भुक्तानी गर्दा सतप्रतिशतसम्म छात्रवृति प्राप्त गर्न सकिने भएको छ। 

वैशाख अन्त्यसम्ममा इसेवाबाट शैक्षिक शुल्क भुक्तानी गर्ने व्यक्तिहरूमध्ये १०० जना भाग्यशाली ग्राहकले एक महिनाका लागि सतप्रतिशत छात्रवृति पाउनेछन्। जुन छात्रवृति रु. ५ हजारसम्मको हुनेछ। 

यो योजना नियमित शैक्षिक शुल्क भुक्तानी गर्ने मासिक भुक्तानी, सेमेस्टर फी भुक्तानी, इन्स्टलमेन्ट भुक्तानीमा मात्र लागू हुने इसेवाले जनाएको छ। यस योजनाअन्तर्गत जसको शैक्षिक शुल्क भुक्तानी भएको छ सोही व्यक्तिले मात्र छात्रवृति प्राप्त गर्नेछ। एजेन्ट नेटवर्कबाट भुक्तानी गरिए पनि जसको शुल्क भुक्तानी भएको छ सोही व्यक्तिले नै छात्रवृति प्राप्त गर्नेछ। 

हाल मुलुकभरका २ हजारभन्दा धेरै विद्यालयमा इसेवामार्फत शैक्षिक शुल्क भुक्तानी गर्न सकिनेछ। 

मोबाइल तथा इन्टरनेटका माध्यमबाट भुक्तानी गर्न सकिने सेवा दिएको इसेवामा हाल प्रत्यक्ष रूपमा खाता खोल्नेको संख्या ४२ लाख नाघेको छ। यसैगरी अप्रत्यक्ष रूपमा करिब १ करोड ६० लाख जनसंख्याले इसेवामार्फत सेवा लिइरहेका छन्। 

हाल इसेवाका देशभर करिब १ लाख १० हजारभन्दा बढी एजेन्ट (इसेवा जोन तथा पोइन्ट) रहेका छन्। हाल इसेवामा मर्चेन्टको संख्या १ लाख ९० हजार नाघिसकेका छन्।

इसेवाबाट इन्स्योरेन्सको प्रिमियम भुक्तानी, सेयर कारोबारको भुक्तानी गर्न सकिनुका साथै मोबाईल, टेलिफोन, इन्टरनेट, बिजुली तथा खानेपानीको महशुल भुक्तानी, रिचार्ज, हवाइजहाज, बसको टिकट, स्कुलकलेजको लगायतका शुल्क भुक्तानी गर्न सकिन्छ। इसेवामा हाल ५० वटा बैंक तथा वित्तीय संस्था सदस्य रहेका छन्। यी बैंकबाट इसेवामा सहजै रकम जम्मा गर्न तथा इसेवाबाट बैंक खातामा रकम पठाउन सकिन्छ।