काठमाण्डौ । एनआईसी एशिया म्युचुअल फन्डअन्तर्गत सञ्चालित हुने १ अर्ब रुपैयाँबराबरको ‘एनआईसी एशिया सेलेक्ट–३० (इन्डेक्स फन्ड)’ आउँदो असार १० गते निष्कासन हुने भएको छ। 

योजना व्यवस्था एनआईसी एशिया क्यापिटल र कोष प्रवर्द्धक एनआईसी एशिया बैंक रहेको यो इन्डेक्स फन्डका १० रुपैयाँ अंकित दरका कुल १० करोड इकाइको सार्वजनिक निष्कासन गर्न लागिएको हो। कुल इकाइमध्ये १५ प्रतिशतले हुन आउने १ करोड ५० लाख इकाइ कोष प्रवर्द्धक एनआईसी एशिया बैंकलाई सुरक्षित राखी बाँकी न्यूनतम ८ करोड ५० लाख इकाइको सार्वजनिक निष्कासन गरिनेछ। 

यो योजनामा लगानीकर्ताले न्यूनतम १०० कित्तादेखि अधिकतममा १ करोड इकाइसम्म खरिद आवेदन दिन सक्नेछन्। यो योजनाको निष्कासन छिटोमा असार १४ गते र ढिलोमा असार २४ गते बैंकिङ समयपछि बन्द गरिनेछ।

लगानीकर्ताले सि–आस्बा सेवामा सहभागी बैंक तथा वित्तीय संस्थाहरु र तिनका शाखा कार्यालयहरुबाट खरिद आवेदन दिन सक्नेछन्। सीडीएसी एन्ड क्लियरिङले सञ्चालन गरेको मेरो सेयरबाट पनि अनलाइन आवेदन दिन सकिनेछ।

एनआईसी एशिया क्यापिटल लिमिटेड योजना व्यवस्थापक रहेको इन्डेक्स फन्ड सात वर्ष अवधि रहेको तेस्रो बन्दमुखी योजना हो। 

यस योजनामा संकलित अधिकांश रकम धितोपत्रको दोस्रो बजारमा सूचीकृत कम्पनीहरुमा लगानी गरिने क्यापिटलले जनाएको छ। यस योजनाको प्रमुख विषेशता भनेको सूचीकृत कम्पनीहरुमा लगानी गर्दा सूचीकृत कम्पनीहरुबाट राम्रा मानिएका कम्पनीहरुमध्ये ३० वटा कम्पनीहरु छनौट गरी लगानी गरिने क्यापिटलले स्पष्ट पारेको छ। 

लगानी गरिने कम्पनीहरुको छनौट गर्दा विभिन्न आन्तरिक प्यारामिटरअनुसार गरिने बताइएको छ। सोहीअनुसार कम्पनीको छनौट गर्दा धितोपत्रको दोस्रो बजारमा सूचीकृत सम्पूर्ण समूह तथा उपसमूहमा समावेश भएका कम्पनीहरुबाट समेत छनौट गरेर लगानी गरिने हुँदा ३० वटा कम्पनीमा गरिएको लगानीले समग्र स्टक एक्सचेन्जमा कायम गरेको सम्पूर्ण समूह तथा उप–समूहको प्रतिनिधित्व गर्ने भएकोले एनआईसी एशिया सेलेक्ट–३० फन्डलाई इन्डेक्स फन्ड भनिएको क्यापिटलले जनाएको छ। 

विशेषतः सूचीकृत कम्पनीहरुमा लगानी गर्दा ३० वटा कम्पनीहरुमा लगानी गरिने भए पनि लगानीको अवसर र चुनौती हेरी लगानी गर्ने कम्पनीहरुको संख्यमा थपघट हुन सक्नेछ र निश्चित समयपछि उक्त कम्पनीहरुको संख्यालाई पुनः मूल्यांककन गरी ३० भन्दा बढी नहुने गरी कायम गरिने बताइएको छ। 

हाल एनआईसी एशिया क्यापिटलले दुईवटा बन्दमुखी योजना तथा एउटा खुलामुखी योजना सञ्चालन गरिहेको छ।