काठमाण्डौ । सूचिकृत कम्पनीकै संचालक तथा जिम्मेवार व्यक्तिबाट सूचना चुहिएर कसरी सेयर दलालहरुसम्म  पुग्दो रहेछ र इन्साइडर ट्रेडिङको  धन्दा  कसरी संचालन हुँदो रहेछ भन्ने प्रमाण फेला परेको छ । 

धितोपत्र बोर्डले आइतबार एक विज्ञप्तिमार्फत सिभिल बैंकको हकप्रद सम्बन्धी सूचना चुहाएर लगानीकर्तालाई सेयर किन्न उक्साएको भन्दै एक धितोपत्र दलाल व्यवसायीमाथि कारबाही गरेको बताएसँगै मिलेमतोमा इन्साइडर ट्रेडिङको  धन्दा हुने  गरेको अर्को गतिलो प्रमाण फेला परेको हो । 

बोर्डले धितोपत्र दलाल व्यवसायी प्रज्ञान सेक्यूरिटिज प्रा.लि.ले २०७३ चैत्रदेखि विराटनगरमा शाखा कार्यालय स्थापना गरी उक्त शाखाबाट समेत कारोबार गर्दै आइरहेकोमा सो शाखाका प्रमुखले मिति २०७४ जेठ ४ गते हुने सिभिल बैंकको साधारणसभाअगावै ‘शेयर किन्नुहोस्, ४० प्रतिशत हकप्रद आउने भएको छ, राम्रो फाईदा हुन्छ, फाईदा गराउने जिम्मा हाम्रो हो’ भन्ने आशयको भाइवर म्यासेजमा ग्रुप बनाएर जानकारी पठाएको देखिएको र सो सम्बन्धमा परेको उजुरीमाथि छानबिन गर्दा दोष प्रमाणित भएको भन्दै ७५ हजार जरीवानाको निर्णय गरेको छ । 

बोर्डको  छानबिनबाट उक्त संस्थाले आफ्नो शाखा कार्यालयको कामकारवाहीलाई सूक्ष्म रुपमा अनुगमन नगरी व्यवसायिक आचरण कायम गराउन नसकेको र संस्थाले व्यवसायिक स्तर कायम गरेको नदेखिएकोले धितोपत्र सम्बन्धी ऐन, २०६३ को दफा १०१ को उपदफा (७) बमोजिम बोर्डबाट धितोपत्र दलाल व्यवसायी प्रज्ञान सेक्यूरिटिज प्रा.लि.लाई कारबाही गरिएको बताइएको छ । 

धितोपत्र सम्बन्धी ऐन, २०६३ को दफा७६ बमोजिम धितोपत्र व्यवसाय संचालन गर्ने संस्थाले आफ्नो व्यवसायलाई स्वस्थ र उच्चस्तरीय राख्ने, उचित सीप, होशियारी र मेहनतका साथ धितोपत्र व्यवसाय गर्ने, धितोपत्र बजारको उच्च मर्यादा कायम राख्ने, धितोपत्र व्यवसायसँग सम्बन्धित अभिलेखहरु राम्रोसँग राख्ने,  धितोपत्र व्यवसाय संचालन गर्ने सम्बन्धमा दक्ष जनशक्ति तयार गर्नका लागि कर्मचारीलाई आवश्यक तालिमको व्यवस्था गर्ने जस्ता कार्य गरी व्यवसायिक स्तर कायम गर्नुपर्नेमा प्रज्ञान सेक्युरिटिजले सो कार्य नगरेको समेत बोर्डको दाबी छ।  

बोर्डले हालसाल बजार अनुगमन तथा सुपरिवेक्षण कार्यलाई सुदृढ गर्दै लगेको परिप्रेक्ष्यमा धितोपत्र सम्बन्धी ऐन बमोजिमको कारबाहीलाई पनि सशक्त बनाउँदै आएको समेत दाबी गरेको छ । यसअघि बोर्डले ३ वटा दलाल व्यवसायीलाई नक्कली सेयरको कारोबारको आरोपमा निकै ठूलो कारबाही गरेको थियो । 

बोर्डले बजार अनुगमन तथा सुपरीवेक्षणलाई सशक्त बनाउँदै लगेको दाबी गरे पनि धितोपत्र दलाल व्यवसायीलाई मात्र कारबाही गरी सिभिल बैंकको हकप्रदको सूचना कसरी ब्रोकरको शाखासम्म पुग्यो भन्ने कुरामा भने मौनता साँधेको छ । साधारणसभाअघि नै ४० प्रतिशत हकप्रद आउँदैछ भन्ने कुराको सूचना कहाँबाट भयो, त्यस्तो सूचना चुहाउने बैंकका संचालक वा कर्मचारी को संलग्न थिए ? उनीहरुमाथि के कस्तो कारबाही भयो ? भन्ने बिषयमा चाहि बोर्डको विज्ञप्ति मौन रहेको पाइएको छ । 

यसरी हेर्दा सूचना चुहाउने मुख्य दोषीलाई उन्मुक्ति दिएर त्यो सूचनाका आधारमा लगानीकर्ता उक्साउने ब्रोकरलाई मात्र कारबाही गरेको देखिएको छ ।