काठमाण्डौ। विश्व महामारी कोरोनाभाइरसको संक्रमणबाट अमेरिकामा बितेको २४ घन्टाको अवधिमा २१ सय बढीको ज्यान गएको छ। एकैदिन यति ठूलो संख्यामा कोरोना संक्रमणबाट ज्यान गएको यो पहिलोपटक हो।

जोन हप्किङ्स युनिभर्सिटीका अनुसार बितेको २४ घन्टामा अमेरिकामा २१ सय ८ जना कोरोना संक्रमितको ज्यान गएको छ। अमेरिकामा हालसम्म ५ लाखभन्दा बढी यो भाइरसबाट संक्रमित भएका छन्। 

कोरोनाले विश्वमा सबैभन्दा बढी मानवीय क्षति इटालीमा भएको छ। अहिले परिस्थिति हेर्दा अमेरिकाको अवस्था इटालीभन्दा पनि भयावह हुन सक्ने अमेरिकी स्वास्थ्य विज्ञहरु बताउँछन्। 

अमेरिकामा हालसम्म १८ हजार ६९३ जनाको ज्यान गइसकेको छ भने ५ लाख ३९९ जना संक्रमित भइसकेका छन्। अमेरिकमा भएका कुल मृत्यु संख्यामा ५० प्रतिशत न्युयोर्कको मात्र रहेको छ। 

इटालीमा हालसम्म १८ हजार ८४९ जनाको ज्यान गइसकेको छ। विश्वभर भने ज्यान गुमाउनेको संख्या १ लाख नाघेको छ। – एजेन्सी