काठमाण्डौ । पछिल्लो २४ घण्टामा देशभर ६३८ जना कोरोना संक्रमित थपिएका छन् । 

कोरोना संक्रमण विस्तार नियन्त्रणका लागि विभिन्न प्रयासहरु भइरहे पनि संक्रमित संख्या घट्नुको साटो झनै बढ्न थालेको हो । 

पछिल्लो २४ घण्टाको अवधिमा काठमाण्डौ उपत्यकामा हालसम्मकै सबैभन्दा धेरै संक्रमित फेला परेका छन् । यो अवधिमा काठमाण्डौ उपत्यकाका तीन जिल्लामा १३४ संक्रमित थपिएका स्वास्थ्य तथा जनसंख्या मन्त्रालयले जनाएको छ । 

भक्तपुरबाट ८ जना, ललितपुरबाट १६ जना संक्रमित थपिएका हुन् । बाँकी काठमाण्डौ जिल्लाबाट थपिएका हुन् । 

यो अवधिमा देशभरबाट १७१ कोरोना संक्रमित निको भएर घर फर्किएका छन् । योसहित डिस्चार्ज हुनेको संख्या १६ हजार ६६४ पुगेको मन्त्रालयले जनाएको छ । हाल देशभर सक्रिय संक्रमितको संख्या ७ हजार २०१ रहेको छ । यसरी नेपालमा कुल कोरोना संक्रमितको संख्या २३ हजार ८६५ पुगेको छ ।