काठमाण्डौ । पछिल्लो २४ घण्टामा देशभर २ हजार ७२२ कोरोना संक्रमित थपिएका छन् । एकैदिन यति धेरै संक्रमित थपिएको यो पहिलो घटना हो । 

देशभर १४ हजार ७३९ पीसीआर परीक्षण गर्दा २७२२ मा कोरोना संक्रमण पुष्टि भएको हो । 

कोरोना संक्रमित थपिने संख्यामा नयाँ रेकर्ड बनेसँगै निको हुनेको संख्यामा समेत नयाँ रेकर्ड नै बनेको छ । पछिल्लो २४ घण्टामा देशभरका ३ हजार ३०७ संक्रमित निको भएर घर फर्किएका छन् । 

यसरी हालसम्मको कुल संक्रमित संख्या ८२ हजार ४५० पुगेको छ भने निको हुनेको कुल संख्या ६० हजार ६९६ पुगेको छ । शुक्रबारसम्मको तथ्यांकअनुसार निको हुने दर बढेर ७४(७३.६)प्रतिशत पुगेको छ ।

शुक्रबारसम्मको सक्रिय संक्रमितको संख्या २१ हजार २३४ रहेको छ ।

पछिल्लो २४ घण्टामा काठमाण्डौ जिल्लामा मात्रै १ हजार २८० संक्रमित थपिएका छन् । यस्तै भक्तपुरमा १९६ र ललितपुरमा १६२ संक्रमित थप भएका छन् । 

यो अवधिमा देशभर थप ११ संक्रमितको मृत्यु भएको छ । योसहित कुल मृतकको संख्या ५२० पुगेको छ ।