काठमाण्डौ । दैनिक रुपमा नेपालमा कोरोना संक्रमितहरुको थपिने संख्याभन्दा निको हुनेको संख्या बढिरहेको छ । यो क्रमले आज पनि निरन्तरता पायो । 

पछिल्लो २४ घण्टामा देशभर ३ हजार ५१ कोरोना संक्रमित थपिए भने ३ हजार ४३० संक्रमित निको भए । 

देशभर गरिएको १३ हजार ६८ पीसीआर परीक्षणमा ३ हजार ५१ जनाको रिपोर्ट पोजिटिभ आएको हो । 

थपिएको संख्यासहित नेपालमा कोरोना संक्रमितको हालसम्मको कुल संख्या १ लाख ८६ हजार हाराहारी पुगेको छ । 

यस्तै, निको हुनेको कुल संख्या १ लाख ४८ हजार ४०८ पुगेको छ भने निको हुने दर करिब ८० प्रतिशत पुगेको छ । 

पछिल्लो २४ घण्टामा थप १८ संक्रमितको ज्यान गएको छ । योसहित नेपालमा कोरोनाबाट मृत्यु  हुनेको कुल संख्या १ हजार ५२ पुगेको छ ।