कोरोना महामारी व्यवस्थापन गर्न जनस्वास्थ्य विज्ञले दिए सरकारलाई यस्ता सुझाव

काठमाण्डौ । नेपालमा कोरोनाको तेस्रो लहर आउने सम्भावना उच्च रहेको भन्दै जनस्वास्थ्य विज्ञहरुले सरकारलाई महामारी व्यवस्थापन र तयारीका लागि १८ बुँदे सुझाव दिएका छन्। 

नेपाल जनस्वास्थ्य प्रतिष्ठानमा आबद्ध जनस्वास्थ्य विज्ञहरुले प्रधानमन्त्री शेरबहादुर देउवासमक्ष सुझाव पेस गरेका हुन् । सुझावमा उच्चस्तरीय कोभिड–१९ व्यवस्थापन समितिमा प्रस्तुत हुनुपूर्व सबै महत्वपूर्ण विषयमा राय लिन योग्य चिकित्सक र जनस्वास्थ्य विशेषज्ञहरु सम्मिलित स्वतन्त्र सल्लाहकारहरुको समूह बनाउन आग्रह गरिएको छ।

यसैगरी १८ वर्षभन्दा माथिका नागरिकलाई यथाशीघ्र खोप लगाउन र खोप कार्यक्रममा निजी क्षेत्रलाई सरकारी सहयोगमा संलग्न गराउनुका साथै वृद्ध÷असाहयमैत्री तथा कम भीडभाड हुने गरी खुला ठाउँमा व्यवस्थापन गर्न सुझाव दिइएको छ। ‘स्वास्थ्यकर्मीलाई उचित तालिमसहितको उच्चस्तरको सचेतना र तयारीको अभ्यास गराउनुपर्छ’, सुझावमा भनिएको छ, ‘आवश्यक औषधि तथा अक्सिजनको आपूर्ति, प्रभावकारी परीक्षण सुविधा, शंकास्पद व्यक्तिका लागि क्वारेन्टिन सेन्टर सञ्चालन गर्न जरुरी रहेको र संक्रमण देखिएकाहरुलाई होम आइसोलेसनमा वा संस्थागत आइसोलेसनमा बस्दा टेलिमेडिसिन तथा मोबाइल स्वास्थ्य एकाइ सेवा सञ्चालन गर्नुपर्छ।’ 

विज्ञहरुले अस्पतालको बेड, एचडीयू, आईसीयू र भेन्टिलेटरको संख्या बढाउन सुझाव दिएका छन् । 

यसैगरी योग्यता र क्षमताका आधारमा तत्काल स्वास्थ्यमन्त्री नियुक्त गर्नसमेत सरकारलाई सुझाव दिइएको छ।