पोखरा। नेपाल राष्ट्र बैंक कर्मचारी संघ पोखरा समितिद्वारा आयोजित गण्डकी प्रदेशस्तरीय अन्तरबैंक फुटसल प्रतियोगिताको चौथो संस्करण पोखरामा सम्पन्न भएको छ। 

प्रतियोगितामा गण्डकी प्रदेशस्थित बैंक तथा वित्तीय संस्थाका पुरुषतर्फ ३२ समूह र महिलातर्फ १६ समूह गरी कुल ४८ समूहको सहभागिता थियो। पोखराको गणेश टोलस्थित स्पोर्टस् क्यासलको फुटसल मैदानमा आयोजित प्रतियोगिता असोज २६ र २७ गते गरी २ दिनसम्म चलेको थियो।

नेपाल राष्ट्र बैंक कर्मचारी संघ केन्द्रीय समितिकी अध्यक्ष गीता पोख्रेल लम्साल प्रतियोगिताको प्रमुख अतिथि थिइन्। प्रतियोगितामा नेपाल राष्ट्र बैंक र बैंकर्सबीच मैत्रीपूर्ण खेल समेत सञ्चालन भएको थियो। 

प्रतियोगितामा महिलातर्फको फाइनल खेलमा नेपाल राष्ट्र बैंकले पोखरा फाइनान्सलाई ४–० गोल अन्तरले विजेता बन्न सफल भएको छ। पुरुषतर्फ प्रभु बैंकले नेपाल इन्भेस्टमेन्ट मेगा बैंक लिमिटेडलाई १–० गोल अन्तरले प्रतियोगिताको विजेता बनेको छ। 

प्रतियोगितामा महिला समूहतर्फ नेपाल राष्ट्र बैंककी विनिता पराजुली र सकुन्तला सापकोटा तथा पोखरा फाइनान्सकी यमुना गुरुङले क्रमशः उत्कृष्ट खेलाडी, सर्वाधिक गोलकर्ता र उत्कृष्ट गोलरक्षकको उपाधि जित्न सफल भए। पुरुषतर्फ प्रभु बैंकका रोहन खड्काले उत्कृष्ट खेलाडी र सर्वाधिक गोलकर्ता तथा नेपाल इन्भेस्टमेन्ट मेगा बैंकका सुजन केसीले उत्कृष्ट गोलरक्षकको उपाधि जित्न सफल भए। 

प्रतियोगितको पुरस्कार वितरण समारोहमा नेपाल राष्ट्र बैंक पोखराकी निर्देशक आर्या जोशी, नेपाल राष्ट्र बैंक कर्मचारी संघ केन्द्रीय समितिकी अध्यक्ष गीता पोख्रेल लम्साल, महासचिव कृष्णप्रसाद खराल, सहकोषाध्यक्ष रमेश खतिवडा, नेपाल राष्ट्र बैंक, पोखराका उपनिर्देशकहरु सम्झना ढकाल, नवीना ढकाल, पुष्कर सुर्खाली, सुदीप त्रिपाठी तथा गभर्नरको कार्यालयका उपनिर्देशक इन्द्रत्रिविक्रम पहारी, बैंकर्स एसोसियसन गण्डकी प्रदेश कमिटिका उपसंयोजक सूर्यप्रसाद तिवारी, डेपलपमेण्ट बैंकर्स एसोसियसन गण्डकी च्याप्टरका संयोजक शंकर केसीको उपस्थिति थियो। उक्त पुरस्कार वितरण समारोहको अध्यक्षता नेपाल राष्ट्र बैंक कर्मचारी संघ पोखरा समितिका अध्यक्ष अर्जुनराज तिवारीले गरेका थिए भने सञ्चालन उपाध्यक्ष जितेन्द्रराज शाक्यले गरेका थिए।