काठमाण्डौ । धितोपत्र बोर्डमा आबद्ध सदस्यहरुले बोर्डबाट अनुमतिपत्र प्राप्त संस्थाको संस्थापक सेयरमा लगानी गर्न तथा आफ्नो कार्यकालमा दोश्रो बजारमा धितोपत्र खरीदबिक्री गर्न रोक लगाइएको छ । 

बोर्डले शुक्रबार “नेपाल धितोपत्र बोर्डका बोर्ड सदस्यको आचारसंहिता, २०७४” बनाएर लागू गर्दै बोर्ड सदस्यलाई त्यस्तो बन्देज लगाएको हो । 

यो आचारसंहितामार्फत बोर्डले आफ्ना कतिपय गोप्य सूचना लिक भएर संचारमाध्यममा पुुगेको ठहर गर्दै कुनै पनि बोर्ड सदस्यले प्रत्यक्ष र अप्रत्यक्ष बोर्डको अहित हुने कुनै पनि सूचना संचारकामाध्यमलाई दिन नहुने कडा व्यवस्था समेत गरेको छ । यस्ता सूचना प्रत्यक्ष अप्रत्यक्ष रुपमा संचारमाध्यमलाई संकेतै मात्र गर्न पनि रोक लगाइएको छ । तर, यो बुँदाको सतप्रतिशत कार्यान्वयन हुने अवस्था देखिदैन । 

नियमनकारी निकायका बोर्ड सदस्यहरु सुशासित भए मात्र समग्र बजारमा सुशासन कायम गर्न सकिने मान्यतासहित बोर्ड सदस्यका लागि आचरण तथा व्यवहार, इमान्दारीता तथा गोपनीयता, वित्तीय अनुशासन, पदको दुरुपयोग, कार्य जिम्मेवारी अनुसार कार्य सम्पादन गर्नुपर्ने, दान, उपहार, चन्दाआदि प्राप्त गर्न र सापटी लिन नहुने, शेयरमा लगानी गर्न नहुने, सञ्चार माध्यमसँगको सम्बन्ध, बोर्डका कामकाज वा समाचार प्रकाशन गर्न नहुने आदि व्यवस्थाहरु समावेश गरी आचारसंहिता लागूू गरिएको प्रष्ट्याएको छ । 

बोर्डले धितोपत्र बजारमा सुशासन कायम गर्ने उद्देश्यले बोर्डका कर्मचारीहरुको लागि आचारसंहिता लागू गरिसकेको तथा सूचीकृत संगठित संस्थाहरुको लागि संस्थागत सुशासन सम्बन्धी निर्देशिका तयार गर्ने क्रममा रहेको समेत जनाएको छ । 

बोर्ड सदस्यका लागि जारी आचारसंहिताको मुख्य बुँदा यस्ता छन्:

  • बोर्ड सदस्यले आफ्नो कार्यकालमा बोर्डबाट अनुमतिपत्र प्राप्त संस्थाको संस्थापक शेयरमा लगानी गर्न तथा आफ्नो कार्यकालमा दोश्रो बजारमा धितोपत्र खरिद बिक्री गर्न हुँदैन । 
  • बोर्ड सदस्यले आफूले प्रतिनिधित्व गरेको संस्थाको अतिरिक्त बोर्डबाट अनुमतिपत्र प्राप्त धितोपत्र व्यवसायी, सूचीकृत सङ्गठित संस्था वा धितोपत्र दर्ता तथा निष्काशन प्रक्रियामा रहेका सङ्गठित संस्थामा सञ्चालक, सल्लाहकार तथा पारिश्रमिक तथा शुल्कपाउने गरी पूर्णकालिन पदाधिकारीको रुपमा रहनु हुँदैन ।
  • बोर्ड सदस्य धितोपत्र व्यवसायी, सूचीकृत सङ्गठित संस्था वा धितोपत्रको दर्ता तथा निष्काशन गरेका  सङ्गठित संस्थाको आधारभूत शेयरधनी वा पदाधिकारी रहेमा त्यस्तो व्यवसायी, सूचिकृत संगठित संस्था वा धितोपत्र दर्ता तथा निष्काशन गरेका सङ्गठित संस्थाको सम्बन्धमा बोर्डलाई जानकारी दिई त्यस्तो संस्था सम्बन्धी हुने छलफल तथा निर्णयमा सहभागी हुनु हुँदैन ।
  • बोर्ड सदस्यले ओहदाको कर्तव्य पालना गर्दा आफूलाई ज्ञात हुनआएको कुनै कुरा वा बोर्ड वा अन्य माध्यमबाट प्राप्त गरेको वा आफूले लेखेको वा सङ्कलन गरेको कुनै सूचना, कागजात वा समाचार प्रत्यक्ष वा अप्रत्यक्ष रूपबाट बोर्डको अहित हुने गरी बोर्ड बाहिरका व्यक्ति तथा कुनै पनि किसिमका सञ्चारकामाध्यमलाई प्रत्यक्ष वा अप्रत्यक्ष रूपले सङ्केत वा प्रकट गर्नु हुँदैन ।
  • बोर्ड सदस्यले अनुमतिपत्र प्राप्त धितोपत्र व्यवसायी, सूचीकृत सङ्गठित संस्था वा धितोपत्रदर्ता तथा निष्काशन प्रक्रियामा रहेका सङ्गठित संस्थालाई कुनै प्रकारको सेवा प्रदान गरेको भए बोर्डलाई सोको जानकारी दिनुपर्नेछ । साथै त्यस्तो संस्थाका सम्बन्धमा बोर्डमा हुने छलफलमा स्वार्थ बाझिने हुँदा त्यस्तो छलफल तथा निर्णयमा भाग लिनु हुँदैन ।
  • बोर्ड सदस्यले बोर्डबाट अनुमतिपत्रप्राप्त धितोपत्र व्यवसायी, सूचीकृत सङ्गठित संस्था तथा कारोबारमा आफ्नो पद र नाम दुरुपयोग गरी कुनै पनि किसिमको व्यक्तिगत तथा पारिवारिक फाइदा हुने क्रियाकलापमा संलग्न हुनु हुँदैन । 
  • बोर्डको काममा कुनै पनि प्रकारले असर पर्ने गरी बोर्ड सदस्यले बोर्डको पूर्व स्वीकृतिबिना कसैबाट कुनै प्रकारको दान, दातव्य, कोसेली वा उपहार माग्न, स्वीकार गर्न वा आफ्नो परिवारको कूनै सदस्यबाट स्वीकार गराउन हुँदैन ।