काठमाण्डौ । कामना सेवा विकास बैंकको रु. १ अर्बको ऋणपत्र नेपाल स्टक एक्सचेन्ज (नेप्से) मा सूचीकृत भएको छ।

नेप्से र कामना सेवा विकास बैंकबीच ‘९% कामना सेवा बैंक लिमिटेड ऋणपत्र २०८७’ नामक ऋणपत्र सूचीकरण सम्झौता भएको हो। योसँगै बैंकको १ हजार अंकित दरका कुल १० लाख इकाइ नेप्सेमा सूचीकृत भएको छ।

यो बैंकले गत माघ २२ गतेदेखि फागुन ६ गतेसम्म यो ऋणपत्र बिक्री गरेको छ। कुल इकाइमध्ये ६ लाख इकाइ व्यक्तिगत तबरबाट र बाँकी ४ लाख इकाइ सर्वसाधारका लागि बिक्री गरिएको थियो। ऋणपत्रको बिक्री प्रबन्धकमा एनआइबिएल एस क्यापिटल लिमिटेड रहेको थियो। 

बैंकको ऋणपत्रमा लगानीकर्ताले वार्षिक ९ प्रतिशतका दरले ब्याज पाउनेछन् भने ब्याज भुक्तानी भने अर्धवार्षिक रुपमा हुनेछ। 

यो ऋणपत्रलाई नेपाल धितोपत्र बोर्डले गत माघ २ गते निष्कासन अनुमति दिएको थियो।

यो ऋणपत्रलाई केयर रेटिङ नेपालले केयर आईआर डबल बी प्लस रेटिङ प्रदान गरेको छ। यसले मध्यम कर्जा जोखिम रहेको संकेत गर्दछ।