काठमाण्डौ । डिजिटल बैंकिङका बारेमा जनचेतना बढाउन र वित्तीय कारोबारलाई सुरक्षित गर्न विभिन्न नवीनतम तरिकाहरूका साथ अगाडि बढ्दै आएको फोनपेले हालै प्राइम कमर्सियल बैंकसँगको सहकार्यमा जिरीमा ‘डिजिटल साक्षरता कार्यक्रम’ सम्पन्न गरेको छ। 

फोनपेले विभिन्न क्षेत्र एवं समुदायहरुमा डिजिटल पेमेन्ट सम्बन्धी विभिन्न कार्यक्रमहरु सञ्चालन गर्दै आएको छ। सुरक्षित एवं सहज तरिकाबाट रकम स्थानान्तरण गर्न, डिजिटल ठगी हुनबाट बच्न, एवं अन्य सुरक्षाको उपायहरु अवलम्बन गर्नजस्ता विभिन्न पक्षहरुलाई समेट्दै जिरीमा यो साक्षरता कार्यक्रमको आयोजना गरिएको हो। 

फोनपेको आयोजना तथा प्राइम कमर्सियल बैंकको सहकार्यमा सञ्चालित साक्षरता कार्यक्रमको उद्घाटन समारोहमा जिरी नगर प्रमुख मित्रबहादुर जिरेल, उपप्रमुख कृष्णमाया बुढाथोकी, दोलखा जिल्लाका प्रमुख जिल्ला अधिकारी कोमलप्रसाद धमला, नेपाल राष्ट्र बैंकका डाइरेक्टर कृष्णराम धोजू, उद्योग वाणिज्य संघ जिरीका बाबुराजा श्रेष्ठ, जिरीका प्रहरीनिरीक्षक विष्णुबहादुर बस्नेत, तारा दल गणका प्रमुख शेरबहादुर बस्नेत, प्राइम कमर्सियल बैंकका महाप्रबन्धक अमृतचरण श्रेष्ठ, फोनपेका चिफ बिजिनेस अफिसर सुमित दास, प्राइम कमर्सियल बैंकका सहायक महाप्रबन्धक सुरेशमान सिंह तथा फोनपेका बिजिनेस डेभलपमेन्ट म्यानेजर रुशान्त श्रेष्ठको सहभागिता थियो।

डिजिटल कारोबारलाई प्रोत्साहन गर्दै आएको फोनपे मार्फत रकम प्राप्त गर्ने व्यक्तिको मोबाइल नम्बर राखेर तुरुन्तै, अन्तरबैंक कारोबारमार्फत तुरुन्तै रकम पठाउन सकिने कुरा फोनपेका चिफ बिजिनेस अफिसर सुमित दासले बताए। 

त्यस्तै प्राइम कमर्सियल बैंकको मोबाइल बैंकिङ एपमा भएको क्यूआर पेमेन्ट, फोनपे डाइरेक्टजस्ता सुविधाहरुको प्रयोग गरेर रकम स्थानान्तरण तथा विभिन्न सेवा तथा वस्तु प्रदायकहरुमा भुक्तानी गर्न सकिने प्राइम कमर्सियल बैंकका महाप्रबन्धक अमृत चरण श्रेष्ठले बताए। 

विभिन्न क्षेत्र एवं समुदायका व्यक्तिहरुको सहभागिता रहेको कार्यक्रममा स्थानीय एवं क्षेत्रीयस्तरमा उल्लेखनीय सहभागिता थियो। कार्यक्रममा अन्तक्रिया एवं समाजमा घटेका घटनाहरुको उल्लेखसमेत गरिएको थियो।