काठमाण्डौ । प्रिमियर इन्स्योरेन्स कम्पनी (नेपाल) लिमिटेडले नागरिक लगानी कोष (सीआईटी) मा रहेको आफ्नो स्वामित्वको संस्थापक सेयर आज बुधबारदेखि लिलामीमा राखेको छ। 

प्रिमियर इन्स्योरेन्सले सीआईटीमा रहेको आफ्नो स्वामित्वको कुल १ लाख ३ हजार ७०० कित्ता संस्थापक सेयर लिलामीमा राखेको छ। लिलामीमा राखिएको सेयरको न्यूनतम मूल्य प्रतिकित्ता १ हजार ३५० रुपैयाँ तोकिएको छ। लगानीकर्ताहरुले न्यूनतम मूल्य वा सोभन्दा बढी बोलकबोल गरी बोलपत्र पेस गर्नुपर्नेछ।

यो लिलामी सेयरमा इच्छुक बैंक तथा वित्तीय संस्था र बीमा कम्पनीहरुले बोलपत्र पेस गर्न पाउनेछन्। न्यूनतम १०० कित्ता र अधिकतममा १० ले भाग जाने गरी सम्पूर्ण कित्ताका लागि आवेदन दिन सकिनेछ।

बोलपत्र नबिल इन्भेस्टमेन्ट बैंकिङ लिमिटेडको काठमाण्डौ नक्सालस्थित कार्यालयमा र नक्सालमा रहेको प्रिमियर इन्स्योरेन्सको केन्द्रीय कार्यालयमा पेस गर्न सकिनेछ। बोलपत्र पेस गर्ने अन्तिम मिति चैत १९ गते बैंकिङ समयसम्म तोकिएको छ।