काठमाण्डौ । बजारमा उछाल आउने ‘शुभ संकेत’ देखिएको छ । बिहीबार नेपाल स्टक एक्सचेञ्जको कारोबार सूचक(नेप्से परिसूचक)मा दोहोरो अंकको वृद्धिसँगै कारोबार रकममा समेत उछाल देखिएसँगै आगामी सातादेखि बजार उकालो यात्रामा अगाडि बढ्ने ‘शुुभ संकेत’ देखिएको हो । 

बुधबार पनि बजारमा नेप्से परिसूचकसँगै कारोबार रकम पनि बढेको थियो । परिसूचक(इण्डेक्स) र कारोबार रकम(टर्नओभर) एकसाथ बढ्नु बजारको भविष्यका लागि ‘शुुभ संकेत’ हो । यो प्रवृति जारी रहेको खण्डमा भविष्यमा बजारले उछालको गति लिने विश्लेषकहरु बताउँछन् । बुधबार र बिहीबारकै बजारको प्रवृति हेर्दा विश्लेषकहरुले भनेजस्तो बजारमा उछाल आउनसक्ने आधारहरु प्रशस्त देखिएका छन् । 

यति मात्र होइन, बजारका लागि सहज अवस्था बिस्तारै बन्दै गएको छ । बैंकहरुमा निक्षेपको वृद्धिदर कर्जाको तुलनामा दोब्बर बढी रहेकोले समेत मौन बसेका लगानीकर्ता सलबलाएका हुन् । सरकारले चौथो त्रैमासको सुरुवातदेखि पूँजीगत खर्चको गति बढाउने भएकोले समेत तरलता सहज हुने र यसले ब्याजदर स्थिरतामा प्रभावकारी भूमिका खेल्ने ठानेका लगानीकर्ता केही आशातित बनेका देखिएको छ । यसबाहेक लगानीकर्ताका संघसंस्थाले थालेका कदम, पछिल्लो समय बजारप्रति केही सकारात्मक जस्तो देखिएका अर्थमन्त्रीका सकारात्मक अभिव्यक्ति, विदेशी ऋण आउने सुखद समाचार लगायतका कारणले बजारमा खरीदको चाप बढेको छ । तेश्रो त्रैमासमा अधिकांश सूचिकृत कम्पनीको विवरण उत्साहजन आउने र यसले समेत बजारमा नयाँ तरंग पैदा गर्ने आशामा लगानीकर्ताहरु सक्रिय भएका देखिएको छ । 

साताको अन्तिम कारोबार दिन बिहीबार बजार परिसूचक २३.९४ अंकले वृद्धि भई १२५०.३९ विन्दूमा पुुगेको छ । कारोबार रकममा उछाल आई ६२ करोडको हाराहारीमा पुुगेको छ । यो निकै उत्साहजनक कारोबारको अवस्था हो । 

यो दिन बजारमा क वर्गका कम्पनीहरुमा खरीद चाप परेका कारण सेन्सेटिभ इण्डेक्स ५.२९ अंकले बढेको छ । यस्तै समग्र कारोबार मापक फ्लोट इण्डेक्स १.८६ अंकले बढ्यो। 

लगानीकर्तालाई उत्साहित बनेका यो दिन बजारका सबै समूहको सूचकमा हरियो पोतिएको छ । बैकिंग समूह १८.९९ अंकले बढ्यो भने विकास बैंक, माइक्रोफाइनान्स र बिमा समूहमा क्रमशः ३१.८१, ३५.४५ र १७४.९५ अंकको बढोत्तरी भयो । यस्तै, बित्त समूह ५.१ अंकले बढ्यो भने होटल समूह १४.७१, जलविद्युत समूह ३५.७५, उत्पादनमूलक ४९.५६ र अन्य समूह ७.९२ अंकले बढ्यो । 

धेरै कारोबार गर्ने कम्पनी
यो दिन बजारमा १ सय ६८ कम्पनीका १५ लाख १४ हजार ३ सय ६९ कित्ता सेयर ६१ करोड ९३ लाख ८३ हजार ८ सय ६६ रुपैयाँमा किनबेच भयो । यो दिन नेपाल इन्स्योरेन्सले सबैभन्दा धेरै ३ करोड ९१ लाख बढीको कारोबार गर्यो । नवील बैंकले २ करोड ६९ लाख, नेपाल लाइफ इन्स्योरेन्सले २ करोड २३ लाख, स्ट्याण्डर्ड चार्टर्डले १ करोड ८२ लाख, इन्भेष्टमेन्ट बैंकले १ करोड ७६ लाख, सानिमा बैंकले १ करोड ४१ लाख, ग्लोबल आइएमई बैंकले १ करोड ३५ लाख, नेपाल बैंकले १ करोड ३२ लाख, एभरेष्ट बैंकले १ करोड २९ लाख र नेपाल एसबीआई बैंकले १ करोड २८ लाख बढीको कारोबार गरे ।

धेरै कमाउने र गुमाउने कम्पनी
यो दिन तिनाउ डेभलपमेन्ट बैंकका लगानीकर्ताले धेरै कमाए । यो कम्पनीको सेयर मूल्य ९ प्रतिशतले वृद्धि भयो । मिथिला लघुवित्त विकास बैंक र ओम डेभलपमेन्ट बैंकका लगानीकर्ताले पनि ९ प्रतिशतकै हाराहारीमा सम्पत्ति बढाए । 

यो दिन गुहेश्वरी मर्चेन्ट बैंक एण्ड फाइनान्सका लगानीकर्ताले धेरै गुमाए । यो कम्पनीको सेयर मूल्य ५.१९ अंकले घट्यो ।