काठमाण्डौ । अर्थमन्त्री डा. युवराज खतिवडाले दुई दर्जनभन्दा बढी बेलायती कम्पनीका व्यवसायी तथा लगानीकर्ताहरुसंग छलफल गरेका छन्। 

ब्रिटिश एक्सपर्टिज इन्टरनेशनल (बिईआई) ले आयोजना गरेकोे ‘नेपालमा लगानीको अवसर’ विषयक कार्यक्रममा मन्त्री खतिवडाले नेपालमा लगानीको अवसर, वातावरण र सम्भावनाका बारेमा त्यहाँका लगानीकर्तालाई प्रष्ट पारेका हुन् ।

मन्त्री खतिवडाले नेपाल लगानीको उपयुक्त गन्तव्य भएको भन्दै लगानी गर्दाका सापेक्षित लाभहरुबारे बेलायतस्थित नेपाली लगानीकर्तालाई समेत जानकारी गराएका थिए । 

नेपालमा लगानीका लागि सरकारले लगानी बोर्डलाई विशिष्टिकृत संस्थाको रुपमा विकास गरेकाले त्यसैमार्फत ठूला व्यवसायी तथा लगानीकर्तालाई एकद्वार सेवा उपलब्ध गराइने पनि पनि बताए । सम्बन्धित कानूनको परिर्माजन र तर्जुमा, नीतिगत तथा प्रशासनिक सुधार गरी लगानी प्रवद्र्धन गर्ने मैत्रीपूर्ण वातावरणको निर्माण गरिएको उनले सो क्रममा बताएका थिए।

लगानी सम्मेलनबाहेक वैदेशिक लगानी प्रर्बद्धनका नियमित क्रियाकलाप के–के छन् भन्ने जिज्ञासामा अर्थमन्त्री खतिवडाले नियमित रुपमा विदेशस्थित नेपाली नियोगलाई आर्थिक कुटनीतिको लागि परिचालन गर्ने, सूचना प्रविधिको अधिक उपयोग गर्दै लगानी बोर्ड, उद्योग मन्त्रालय आदिका वेभसाइटमार्फत लगानी प्रवद्र्धनात्मक क्रियाकलाप संचालन गर्नेलगायत सरकारका नीति कार्यक्रम तथा वार्षिक बजेटको बिषयमा समेत प्रष्ट पारेका थिए । 

कार्यक्रममा नेपालमा गरिने लगानीको सुरक्षा र सहज वातावरण दिन सरकार तयार रहेको समेत विश्व समुदायलाई उनले विश्वास दिलाएका निजी सचिवालयले जनाएको छ । 

चैत १५ र १६ गते नेपाल ठूला लगानीकर्ता आकर्षित हुन भन्नको लागि आयोजना हुन लागेको लगानी सम्मेलनको पूर्व तयारी स्वरुप खतिवडा बेलायत गएका हुन् ।