काठमाण्डौ । भिजन लुम्बिनी ऊर्जा कम्पनीले आईपीओ निष्कासनको अनुमति पाएको छ। 

नेपाल धितोपत्र बोर्डबाट भदौ ५ गते यो कम्पनीलाई आईपीओ निष्कासनको अनुमति दिएको हो। अब कम्पनीले जारी पुँजी १ अर्ब ९१ करोड २५ लाख रुपैयाँको २० प्रतिशतले हुन आउने ३८ करोड २५ लाख रुपैयाँबराबरको ३८ लाख २५ हजार कित्ता साधारण सेयर निष्कासन गर्नेछ।

कुल कित्तामध्ये कम्पनीले जारी पुँजीको १० प्रतिशतले हुन आउने १९ लाख १२ हजार ५०० कित्ता साधारण शेयर आयोजना प्रभावित क्षेत्र कास्कीको माछापुच्छ्रे गाउँपालिकाको वडा नं १,२,३,४ र पोखरा महानगरपालिकाको वडा नं १९ का स्थानिय बासिन्दाका लागि जारी गर्नेछ। बाँकी १० प्रतिशतमध्येको १० प्रतिशतले हुन आउने १ लाख ९१ हजार २ सय ५० कित्ता साधारण सेयर नेपाल सरकारको सम्बन्धित निकायबाट श्रम स्वीकृति प्राप्त गरी बिदेशमा बसी रोजगार गरिरहेका नेपालीका लागि, ५ प्रतिशत अर्थात ९५ हजार ६२५ कित्ता साधारण सेयर सामुहिक लगानी कोष, २ प्रतिशत अर्थात् ३८ हजार २५० कित्ता कम्पनीमा कार्यरत कर्मचारीका लागि र बाँकी १५ लाख ८७ हजार ३७५ कित्ता साधारण सेयर सर्वसाधारणहरुका लागि निष्कासन गर्नेछ।

२०७५ मा कम्पनी कार्यालयमा दर्ता भई कम्पनीले ऊर्जा क्षेत्रमा कास्कीको माछापुच्छ्रे गाउँपालिकाको वडा नं. १, २, ३ र ४ तथा पोखरा महानगरपालिकाको वडा नं. १९ मा २५ मेगावाटको सेती नदी जलविद्युत आयोजनाको निर्माण गरिरहेको छ। करिब ९२ प्रतिशत काम सकिइसकेकोले अबको केही महिनाभित्रमै बत्ती बाल्ने तयारीमा रहेको कम्पनीका कार्यकारी अध्यक्ष जगतबहादुर पोखरेलले जानकारी दिए। 

२५ मेगावाटको सेतीखोला जलविद्युत आयोजनाको प्रवर्द्धन गर्दै आएको कम्पनीमा एचआईडीसीएल, शाइन रेसुंगा डेभलपमेन्ट बैंक, प्रभु लाइफ इन्स्योरेन्स, सिटिजन लाइफ इन्सुरेन्सलगायत करिब १ हजार ५०० जना संस्थापक सेयर सदस्यहरुको लगानी रहेको छ। 

कम्पनीको धितोपत्र निष्कासन तथा बिक्री प्रबन्धक मुक्तिनाथ क्यापिटल लिमिटेड रहेको छ।