काठमाण्डौ । महिला लघुवित्त वित्तीय संस्था लिमिटेडको आईपीओ निष्कासन मिति सारेको छ।

यसअघि तोकेको मितिभन्दा २ दिनपछि यो आईपीओ निष्कासन हुने भएको हो। सीडीएस एन्ड क्लियरिङले प्राविधि कारण देखाई आईपीओ निष्कासन मिति सार्न अनुरोध गरेपछि नयाँ मिति तोकिएको धितोपत्र निष्कासन तथा बिक्री प्रबन्धकमा नेपाल एसबीआई मर्चेन्ट बैंकिङ लिमिटेडले जनाएको छ। 

अब महिला लघुवित्तको कुल ४ करोड रुपैयाँबराबरको आईपीओ यही माघ ३० गतेबाट निष्कासन हुनेछ। आईपीओ निष्कासन बन्द भने छिटोमा फागुन ४ गते र ढिलामा फागुन १४ गते बैंकिङ समयपछि हुने जनाइएको छ।

यसअघि यो आईपीओ माघ २८ गतेदेखि निष्कासन हुने र निष्कासन बन्द छिटोमा फागुन २ गते र ढिलामा फागुन १२ गते बैंकिङ समयपछि हुने भनिएको थियो।

संस्थाले १०० रुपैयाँ अंकित दरका कुल ४ करोड रुपैयाँबराबरको आईपीओ निष्कासन गर्ने भएको हो। कुल कित्तामध्ये ५ हजार कित्ता कर्मचारी र २० हजार कित्ता समूहिक लगानी कोषहरुका लागि छुट्याइएको छ। बाँकी ३ लाख ७५ हजार कित्तामा सर्वसाधारणले आवेदन दिन सक्नेछन्। 

यो आईपीओमा न्यूनतम १० कित्तादेखि अधिकतम १ हजार कित्तासम्म आवेदन दिन सकिनेछ। लगानीकर्ताले सि–आस्वाका माध्यमबाट आईपीओ भर्न सक्नेछन्। 

हाल महिलाको लघुवित्तको चुक्ता पुँजी ६ करोड रुपैयाँ रहेको छ। यो आईपीओ बिक्रीपछि चुक्तापुँजी १० करोड रुपैयाँ पुग्नेछ। 

यो लघुवित्तको मुख्य कार्यालय काभ्रेमा रहेको छ भने काठमाण्डौ उपत्यकाभित्र १० र बाहिरका विभिन्न जिल्लामा १० गरी २० शाखा कार्यालय रहेका छन्। 

यो लघुवित्त राष्ट्रिय स्तरको लघुवित्त हो ।