काठमाण्डौ । सूर्योदय वोमी लघुवित्त वित्तीय संस्था लिमिटेडको सेयरमूल्य समायोजन गरिएको छ। 

नेपाल स्टक एक्सचेन्ज (नेप्से)ले गत आर्थिक वर्षको बोनस सेयरका लागि सूर्योदय वोमी लघुवित्तको सेयरभाउ समायोजन गर्दै प्रतिकित्ता ६०२.६१ रुपैयाँ कायम गरेको छ। यसअघिको अन्तिम कारोबार मूल्यअनुसार प्रतिकित्ता ६९३ रुपैयाँ थियो। अब समायोजित मूल्यअनुसार यो लघुवित्तको सेयर कारोबारमा आउनेछ।

वार्षिक साधारणसभा र लाभांश प्रयोजनार्थ संस्थाले आज वैशाख १४ गतेदेखि वैशाख ३० गतेसम्म बुक क्लोज गर्ने निर्णय गरेको छ। यसको अर्थ हिजो वैशाख १३ गतेसम्म कायम सेयरधनीहरुमात्रै यो संस्थाको लाभांश पाउन र सभामा भाग लिन योग्य भएका छन्। 

संस्थाले आफ्नो ११ औँ वार्षिक साधारणसभा यही वैशाख ३० गते आयोजना गर्ने निर्णय गरेको छ। सभा बिहान ९ बजेबाट सुरु हुनेछ। 

सभाले आर्थिक वर्ष २०७८–७९को वितरणयोग्य मुनाफाबाट हाल कायम चुक्तापुँजी ७९ करोड १९ लाख ८४ हजार ७९० रुपैयाँको १५ प्रतिशतले हुन आउने ११ करोड ८७ लाख ९७ हजार ७१८.५ रुपैयाँबराबरको बोनस सेयर वितरण गर्ने सञ्चालक समितिको प्रस्ताव अनुमोदन गर्नेछ। 

साबिक वोमी लघुवित्त र सूर्योदय लघुवित्त आपसमा मर्ज भई २०७८ चैत १९ गतेदेखि एकीकृत कारोबार सुरु गरेको थियो। एकीकृत कारोबार भएको मितिबाट २ वर्षसम्म लाभांश कर छुट हुने व्यवस्था भएकोले बोनस सेयर कर प्रयोजनार्थ छुट्टै रकम नछुट्याइएको संस्थाले जनाएको छ। 

यसका साथै एकीकृत कारोबार सुरु भएको मितिभन्दा पछि सेयर खरिद गर्ने सेयरधनीहरुले भने लाभांश करबापत नियमानुसार रकम भुक्तानी गर्नुपर्ने संस्थाले जनाएको छ।

सभाले उक्त आर्थिक वर्षको वार्षिक प्रतिवेदन र लेखापरीक्षकको प्रतिवेदन पनि अनुमोदन गर्नेछ।