काठमाण्डौ । मौलाकाली केबलकार औपचारिक रुपमा सञ्चालनमा आएको छ। 

प्रधानमन्त्री पुष्पकमल दाहाल ‘प्रचण्ड’ले सोमबार गैँडाकोट–१ मा रहेको मौलाकाली केबलकार बटम स्टेसनमा ताम्रपत्र अनावरण गर्दै केबलकार सञ्चालनको औपचारिक उद्घाटन गगरेका हुन्। 

उद्घाटन समारोहलाई सम्बोधन गर्दै प्रधानमन्त्री दाहालले शिथिल अर्थतन्त्रलाई उकास्न मौलाकालीजस्ता पर्यटकीय पूर्वाधारको महत्व रहने उल्लेख गर्दै सरकार, निजी क्षेत्रलाई सहजीकरण गर्न प्रतिबद्ध रहेको बताए। उनले आर्थिक वृद्धि र रोजगारी सिर्जनामा निजी क्षेत्रको भूमिका ठूलो रहेको बताए। 

तनहुँ, नवलपुर र चितवन जिल्ला पर्यटकीय हब बन्दै गएको उल्लेख गर्दै प्रधानमन्त्री दाहालले यस क्षेत्रलाई आर्थिक समृद्धिको क्षेत्रका रुपमा विकास गर्ने पनि बताए। 

त्यसैगरी गण्डकी प्रदेश प्रमुख पृथ्वीमान गुरुङले मौलाकाली केबलकारको निमार्णसँगै यस क्षेत्रको आर्थिक तथा सामाजिक विकासमा सहयोग पुग्ने विश्वाससमेत व्यक्त गरे। 

उद्घाटन समारोहमा मौलाकाली केबलकारका अध्यक्ष चन्द्रप्रसाद ढकालले देशको शिथिल अर्थतन्त्रलाई उकास्न पर्यटकीय पूर्वाधार निर्माणलाइ तीव्रता दिन र विकासका काम समयमै पूरा हुने वातावरण बनाउन आग्रह गरे। नेपाल उद्योग वाणिज्य महासंघका अध्यक्षसमेत रहेका ढकालले निजी क्षेत्रले तोकिएको समयमा, तोकिएकै बजेटमा, तोकिएकै गुणस्तरमा काम गर्न सक्षम छौँ भन्ने उदाहरण मौलाकाली केबलकारसमेतले प्रस्तुत गरेको बताए। 

मौलाकाली केबलकार निर्माणकै रफ्तारमा अन्य पर्यटकीय पूर्वाधार र विकासमा काम सम्पन्न हुने हो भने अर्थतन्त्रमा देखिएको शिथिलता स्वतः कम हुँदै जाने अध्यक्ष ढकालले उल्लेख गरे। मुलुकका सबै प्रदेशमा कम्तीमा एउटा यस्तै पर्यटकीय पूर्वाधार निर्माणको काम तीव्र पारेको भन्दै उनले बुटबलमा निर्माणाधीन लुम्बिनी केबलकार पनि केही हप्ताभित्रै सञ्चालनमा आउने जानकारी पनि दिए। 

मौलाकाली केबलकारसहितको पर्यटकीय पूर्वाधार रहेको स्थलको महत्वबारे उल्लेख गर्दै अध्यक्ष ढकालले चितवन, तनहुँ र नवलपुरको संगम क्षेत्र नेपालकै धार्मिक तथा सांस्कृतिक महत्वको पवित्र भूमि रहेको बताए। 

मौलाकालिका मन्दिरको साढे ४०० वर्ष पुरानो इतिहास छ। यस मन्दिरबाट दाहिनेतर्फ देखिने देवघाट वैदिक सनातन धर्ममा पवित्र भूमि हो। नारायणी, देवघाट र त्रिवेणीजस्ता देवभूमि र तपोभूमिसहितका सम्पदाहरुको ऐतिहासिक गरिमा र महिमालाई सबै नेपालीसमक्ष पुर्याउन केबलकार सहितका नयाँ पर्यटकीय संरचनाले सघाउ पुग्ने विश्वास लिएको पनि अध्यक्ष ढकालले उल्लेख गरे। 

पर्यटनको विकासमार्फत स्थानीय नागरिकको जीवनस्तर उकास्दै देशको समृद्धि हासिल गर्ने कामलाइ निरन्तरता दिने प्रतिबद्धता पनि ढकालले व्यक्त गरे। स्थानीय सांस्कृतिक महत्वका संरचनाहरु राष्ट्र र जनताका साझा सम्पत्ति रहेको भन्दै उनले नवलपुरको गहनाका रुपमा निर्मित मौलाकाली केबलकारसहितको पर्यटकीय संरचनालाई स्थानीय जनताको आफ्नै सम्पत्तिका रुपमा विकास गर्ने मोडल अघि सारेर स्थानीय समुदायको अधिकतम सहभागीता गराएको पनि बताए। 

अहिले नेपाल आउने विदेशी पर्यटकको औसत खर्च तथा बसाइ निकै कम छ र प्रतिदिन झन् घट्दोछ। यसलाइ बढाउनुपर्ने चुनौती छ। पर्यटकलाई आकर्षित गर्ने, उनीहरुको नेपाल बसाई र खर्च बढाउने खालका थप ठूला पूर्वाधारहरु निर्माण गर्नुपर्ने छ। 

यहाँको संस्कृति, कला, प्राकृतिक सौन्दर्य र यहाँको अलौकिक भूगोलको ज्ञानका लागि नेपालमा पर्यटक आउने गर्छन्। ‘त्यसैले थप पर्यटकीय पूर्वाधारको विकास गर्नुपर्ने र यसमा सरकारले निजी क्षेत्रलाई जतिधेरै सहजीकरण गरेर साझेदारीको मोडल अपनाउने नीति लिन्छ, त्यति नै छिटो देशको विकास हुनेछ’, ढकालले भने। 

अध्यक्ष ढकालले भने, ‘हामीलाई प्रकृतिले अपार सम्पदा बरदान दिएको छ। पर्यटन, प्रकृति र पर्यावरणमा हामीले गर्नसक्ने सम्भावना असंख्य छन्। त्यसमा हामीले हाम्रो भिजन र इच्छाशक्ति मिसायौँ र प्रविधि र पुँजी जोड्न सक्यौँ भने साँच्चिकै मिराकल हुन्छ भन्ने मेरो आत्मविश्वास छ। मलाई लाग्छ, यो मुलुकको निजी क्षेत्र निश्चय पनि विकास र परिवर्तनमा यस्तै मिराकल ल्याउन सक्षम छ। हामीले पटकपटक यसको पुष्टि पनि गर्दै आएका पनि छौँ।’

धेरै स्थानीय तहहरुले आफ्नो क्षेत्रमा लगानी भित्र्याउन प्रतिस्पर्धा गर्नुपर्छ र त्यसका लागि लगानीकर्ताहरुलाई आह्वान मात्र गरेर पुग्दैन ठोस र व्यवहारिक नीति मार्फत सहजीकरण गर्नुपर्ने पनि अध्यक्ष ढकालले बताए। समग्र मुलुकको निजी क्षेत्रको नेतृत्वका हैसियतले लगानीमैत्री वातावरण निर्माण गर्न नीतिगत सुधार र सहुलीयतपूर्ण व्यवस्थाले मात्र स्वदेशी तथा विदेशी लगानी भित्र्याउन सकिन्छ भन्नेमा आफू दृढ रहेको पनि उनले उल्लेख गरे। 

ढकालले मौलाकाली केबलकार तथा पर्यटकीय पूर्वाधार  निर्माणमा सहयोग गर्ने संघ, प्रदेश तथा स्थानीय सरकार, राजनीतिक दल, स्थानीयवासी, मन्दिर व्यवस्थापन समिति, वन उपभोक्ता समितिलगायत अन्य सबै सरोकारवालाप्रति धन्यवाद व्यक्त गरे। 

करिब १ हजार २०० मिटर लम्बाइको केबलकारमा १४ वटा गोण्डोला रहेका छन्। फेदीबाट केबलकार चढेपछि ५ मिनेटमा मन्दिरनजिकै रहेको टप स्टेसनसम्म पुग्न सकिन्छ। 

माथिल्लो स्टेसनसँगै बनिरहेको होटेलमा ६० कोठा, ब्यांक्वेट हल, स्विमिङ पुल र रेस्टुरेन्ट रहेका छन्। परियोजनको लागत करिब २ अर्ब रुपैयाँ रहेको छ।