काठमाण्डौ । मनसुनी वायुको प्रभावले हाल मुलुकका विभिन्न स्थानमा बदली र वर्षा भइरहेको छ। 

हाल प्रदेश नं २ र बागमतीमा आंशिकदेखि सामान्य बदली र बाँकी प्रदेशमा सामान्यदेखि पूर्ण बदली तथा १, बागमती, गण्डकी, लुम्बिनी र सुदूरपश्चिमका केही स्थानमा हल्कादेखि मध्यम वर्षा भइरहेको छ। काठमाण्डौ उपत्यकामा बिहानपख मौसम खुले पनि अहिले आंशिक रुपमा बदली छ। 

जल तथा मौसम विज्ञान विभाग, मौसम पूर्वानुमान महाशाखाका अनुसार अहिले कर्णाली तथा सुदूरपश्चिममा आंशिकदेखि सामान्य बदली रही देशका बाँकी भूभागमा सामान्यदेखि बदली रहनेछ। प्रदेश नं १, २, बागमती, गण्डकी र लुम्बिनीका केही स्थान तथा कर्णाली र सुदूरपश्चिमका थोरै स्थानमा हल्कादेखि मध्यम वर्षाको सम्भावना छ।

राति देशका अधिकाश भूभागमा बदली रहनाका साथै प्रदेश नं १, २, बागमती, गण्डकी र लुम्बिनीका थोरै स्थानमा तथा कर्णाली र सुदूरपश्चिमका थोरै स्थानमा हल्कादेखि मध्यम वर्षाको सम्भावना छ। प्रदेश नं १ का एकदुई स्थानमा मेघ गर्जनरचट्याङसहित भारी वर्षाको सम्भावना छ।

बुधबार पनि देशका अधिकांश भूभागमा सामान्यदेखि पूर्ण बदली रहनेछ। प्रदेश नं १, २, बागमती, गण्डकी र लुम्बिनीका केही स्थान तथा कर्णाली र सुदूरपश्चिमका थोरै स्थानमा हल्कादेखि मध्यम वर्षाको सम्भावना छ। प्रदेश नं १, २, बागमती र गण्डकीका थोरै स्थानमा मेघ गर्जनरचट्याङसहित भारी वर्षाको सम्भावना छ।

बिहीबारसम्म यही मौसमी प्रणाली कायम रहने महाशाखाको अनुमान छ। महाशाखाको पछिल्लो विवरणमा मंगलबार काठमाण्डौको अधिकतम ३० र न्यूनतम तापक्रम २१ डिग्री सेल्सियस छ। विराटनगरमा सबैभन्दा बढी ५८ र काठमाण्डौमा २८ मिलिमिटर वर्षामापन गरिएको छ।