काठमाण्डौ । आसन्न प्रतिनिधि र प्रदेशसभा निर्वाचनका लागि म्यादी प्रहरीमा भर्ना खुलेको छ। 

नेपाल प्रहरीले आसन्न निर्वाचनका लागि म्यादी प्रहरीमा भर्ना खुला भएको आह्वान गरेको हो। म्यादी प्रहरीमा १ लाख १५ हजारजनाका लागि भर्ना खुलाइएको छ। 

म्यादी प्रहरीमा भर्ना हुन इच्छुकले यही भदौ ३० गतेबाट दरखास्त पेस गर्न सक्नेछन्। दरखास्त प्रहरी परिसर (काठमाण्डौ, ललितपुर र भुक्तापुर) र सबै जिल्ला प्रहरी कार्यालयमा पेस गर्न सकिनेछन्। 

दरखास्त पेस गर्ने अन्तिम मिति असोज ६ गतेसम्म तोकिएको छ। दरखास्त पेस गरेका उम्मेदवारहरुले सम्बन्धित प्रहरी कार्यालयमा असोज ७ गते सम्पर्क गर्नुपर्नेछ। 

प्रारम्भिक छनोट प्रक्रिया असोज ९ गतेदेखि असोज १४ गतेसम्म सञ्चालन हुनेछ। अन्तिम नतिजा प्रकाश असोज २५ गते हुनेछ। असोज ३० गतेदेखि कात्तिक ८ गतेसम्म प्रशिक्षण सञ्चालन हुनेछ। 

निर्वाचनमा खटिने म्यादी प्रहरीको कार्य अवधि ४० दिनको हुनेछ। 

सेवा तथा सुविधा

  • म्यादी प्रहरीका लागि प्रतिदिन रु. ८६९ का दरले ४० दिन सम्मका लागि निजको व्यक्तिगत बैंक खातामा रकम जम्मा गरिदिने गरी जम्मा पारिश्रमिक रु. ३४ हजार ७६० प्राप्त हुनेछ।
  • खाद्यान्नबापत प्रतिव्यक्ति एकमुष्ट रु. ७ हजार २०० हुनेछ भने हिमाली जिल्लामा खटिने म्यादी प्रहरीका हकमा जिल्लाको न्यूनतम राशन दररेटअनुसारको रकम पाउनेछन्।
  • तोकिएको पोसाक तथा अन्य सामान खरिद गर्ने गरी प्रतिव्यक्ति रु.६ हजार एकमुष्ट उपलब्ध हुनेछ भने हिमाली जिल्लामा खटिने म्यादी प्रहरीलाई गाढा निलो रङको कपडाको ज्याकेट खरिद गर्न प्रतिव्यक्ति थप रु. १ हजार उपलब्ध हुनेछ।
  • निर्वाचनका क्रममा खटिने म्यादी प्रहरीलाई खटिएको ठाउँमा आउने र जाने तयारीस्वरूप प्रतिम्यादी प्रहरी एकमुष्ट रु.१ हजारका दरले तयारी खर्च उपलब्ध हुनेछ भने रु. ३०० का दरले ४ दिनका लागि खाजा खर्च उपलब्ध हुनेछ।
  • अन्य सुविधा नेपाल सरकारले तोकेबमोजिम हुनेछ।