काठमाण्डौ । विश्व लगानीकर्ता सप्ताह–२०२३का अवसरमा धितोपत्र ब्रोकर्स एसोसिएसन नेपालले आज असोज १६ गतेबाट सेयर सचेतना तथा तालिम कार्यक्रम आयोजना गर्ने भएको छ। 

एसोसिएसनले विभिन्न कलेजमा अध्ययनरत विद्यार्थीलाई लक्षित गरी असोज १९ गतेसम्म यस्ता कार्यक्रम आयोजना गर्ने भएको हो। जसअनुसार एसोसिएसनले आज काठमाण्डौको सरस्वतीनगरस्थित रिलायन्स कलेजमा यो कार्यक्रम सञ्चालन गर्नेछ। 

त्यसैगरी असोज १७ गते ललितपुरको बालकुकमारीस्थित क्यातफोर्ड इन्टरनेसनल कलेज, असोज १८ गते कीर्तिपुरको त्रिभुवन विश्वविद्यालयस्थित सेन्ट्रल डिपार्टमेन्ट अफ म्यानेजमेन्ट र असोज १९ गते पनौतीको पनौती नगरपालिकाको कार्यालयमा यो कार्यक्रमको आयोजना गरिने एसोसिएसनले जनाएको छ। 

यसैगरी असोज २० गते शनिबार एसोसिएसनले काठमाण्डौको भृकुटीमण्डपदेखि वसन्तपुर दरबार स्क्वायरसम्म वाकाथन कार्यक्रम गर्ने भएको छ।

वाकाथन कार्यक्रम नेपाल धितोपत्र बोर्डका अध्यक्ष रमेशकुमार हमालको सहभागिता पनि रहनेछ। 

असोज २१ गते भने एसोसिएसनले धितोपत्र बोर्डका अध्यक्ष हमालको उपस्थितिमा बजार विकास सम्बन्धमा अन्तर्क्रिया कार्यक्रम गर्नेछ।