काठमाण्डौ । सीडीएस एन्ड क्लियरिङ लिमिटेड (सीडीएससी) ले यही साता ‘मेरो सेयर’ मोबाइल एप सार्वजनिक गर्ने भएको छ।

सीडीएससीका नवनियुक्त सीईओ पूर्णप्रसाद आचार्यले सीडीएससीको मेरो सेयरका फिचर्स समावेश भएको मोबाइल एप यो साताभित्र सार्वजनिक गर्ने तयारी भइरहेको जानकारी दिएका हुन्। ‘मोबाइल एप गुगल प्लेस्टोरबाट डाउनलोड गर्न सकिने र केही समयपछि मात्र एप्पलको आईओएसबाट पनि डाउन गर्ने सुविधा दिन लागिएको छ’, उनले भने, ‘१५ दिनजति हामी बजारबाट प्रतिक्रिया लिनका लागि सार्वजनिक गर्छौं अनिमात्र औपचारिक कार्यक्रममार्फत मोबाइल एप सुरुआत गर्नेछौँ।’

मोबाइल एपमा सीडीएससीको वेबभर्जनमा रहेको जस्तै लोगो समावेश हुनेछ। प्रयोगकर्ताले युजर नेम र पासवर्ड खुल्नेबित्तिकै हाल ‘मेरो सेयर’मा समावेश भएकै ड्यासबोर्ड खुल्ने बताइएको छ।

मोबाइल एपबाट लगानीकर्ताहरुलाई सहज र गुणस्तरीय सेवा प्रदान गर्न र सीडीएससीको वेबसाइटमा भार पनि निकै कम पर्ने विश्वास सीडीएससीको छ।