सेयर बजारसँगै सुनको मूल्यमा पनि उछाल, एकैदिन रु. १५०० ले बढ्यो

काठमाण्डौ । सुनको भाउमा दैनिकजसो नयाँ रेकर्डहरु बन्न थालेका छन् । सोमबार पनि सुनको भाउमा नयाँ कीर्तिमान कायम भएको छ । यो दिन अघिल्लो दिनको तुलनामा तोलामा १५ सय रुपैयाँले बढेर सुनको मूल्य ८० हजार ३०० को उचाईमा पुगेको छ । 

आइतबार नेपाली बजारमा सुनको मूल्य प्रतितोला ७८ हजार ८०० पुगेको थियो । सोमबार एकैदिन तोलामा १ हजार ५०० ले वृद्धि भएको हो । 

सुनको मूल्य केही दिनदेखि लगातार बढिरहेको छ । उछालको गतिमा कुदेको सुनको मूल्य १० दिनको अवधिमा प्रतितोलामा ४ हजार ३०० ले बढोत्तरी भइसकेको छ । 

फागुन २ गते प्रतितोला ७६ हजारमा कारोबार भएको सुनको भाउ त्यसपछि लगातार उकालो लागिरहेको छ । 

सुनसँगै चाँदीको भाउ समेत बढिरहेको छ । चाँदीको मूल्य सोमबार प्रतितोला ९२५ रुपैयाँ पुगेको छ । आइतबार प्रतितोला ९२० रुपैयाँमा सीमित थियो ।

फागुन ७ गते प्रतितोला ९०५ रुपैयाँमा कारोबार भएको चाँदीको भाउ ८ र ९ गते प्रतितोला ९१५ रुपैयाँ कायम भएको थियो । 

कोरोना भाइरसको प्रभावले चीनलगायतका देशका व्यापार ठप्प भएपछि कच्चा तेलको आपूर्ति प्रभावित भई मूल्य घटेपछि यसको प्रभाव सुनको मूल्यमा देखिएको हो । लगानीकर्ताहरु सुरक्षित लगानीका लागि सुनमा आकर्षित भएपछि यसको अन्तराष्ट्रिय बजारको मूल्यमा समेत उछाल आइरहेको छ । यसैको प्रभाव नेपालमा समेत परेको हो।