काठमाण्डौ । नेपाल स्टक एक्सचेञ्ज लिमीटेडले पुस १७ गतेदेखि बैंकिङ प्रणालीसँग एकीकृत गरी पूर्ण स्वचालित अनलाइन कारोबार प्रणाली संचालनमा ल्याउन लागेको छ । 

यसैको पूर्वसन्ध्यामा नेप्सेले अनलाइनबाट सेयरको कारोबार गर्न इच्छुक लगानीकर्ताहरुले गर्नुपर्ने आवश्यक तयारीको सूचि सार्वजनिक गरेको छ । 

नेप्सेले लगानीकर्ताले अनलाइन कारोबारमा सहभागी हुन गर्नुपर्ने १० वटा पूर्व तयारीसँग सम्बन्धित कामको सूचि सार्वजनिक गरेको हो । 

नेप्सेका अनुसार अनलाइन कारोबार गर्न चाहने लगानीकर्ताले आफ्नो ब्रोकरकहाँ खोलेको कारोबार खाताको केवाइसी अद्यावधिक गर्नुपर्नेछ । 

यस्तै, हितग्राही खाता सम्बन्धी विवरण अद्यावधिक गर्नुपर्ने, एक हितग्राही खातासँग एउटा मात्र कारोबार खाता आबद्ध गर्नुपर्ने, नेप्सेले तोकेको राफसाफ बैंकमा कारोबारका लागि अलग्गै खाता खोली ब्रोकरसँग रकमान्तर गर्ने व्यवस्था मिलाउनुपर्ने र यस्तो बैंकबाट इबैकिङ सुविधा समेत अनिवार्य लिनुपर्ने भनिएको छ । 

यसबाहेक लगानीकर्ताले गर्नुपर्ने अन्य कामको सूचि यस्तो छ:

  • ब्रोकरलाई अनिवार्य रुपमा आफूले चलाइरहेको इमेल ठेगाना उपलब्ध गराउने
  • ब्रोकर कार्यालयमा गई अनिवार्य रुपमा तोकिएको कारोबार सदस्य ग्राहक सम्झौता गर्ने ।
  • आवश्यकता अनुसार रकम जम्मा गरी ब्रोकरबाट कारोबार सीमा लिने ।
  • कारोबारबाट बाँकी रकम बैंकिंग प्रणालीमार्फत फिर्ता लिन ब्रोकरलाई अनुरोध पठाउने । यस्तो अनुरोध पठाएको २४ घण्टाभित्रै रकम प्राप्त भएको सुनिश्चित गर्ने ।
  • हितग्राही खातामा रहेको फ्री ब्यालेन्समा बिक्री गर्न सकिने । धितो राखेको वा रोक्का रहेको धितोपत्र बिक्री नगर्ने । 
  • बिक्री कारोबार भएको भोलिपल्टसम्म बिक्री बमोजिमको इडीआइएस ब्रोकरलाई उपलब्ध गराउने ।