पूर्वप्रधानमन्त्रीहरुसँग एफएनसीसीआईको आग्रह– ‘आर्थिक पुनरुत्थानका लागि सरकार र दलहरुको सहयोग आवश्यक’

काठमाण्डौ । नेपाल उद्योग वाणिज्य महासंघ (एफएनसीसीआई) का नवनिर्वाचित पदाधिकारीहरूले बुधबार नेपाली कांग्रेसका सभापति एवं पूर्वप्रधानमन्त्री शेरबहादुर देउवा र नेपाल कम्युनिष्ट पार्टी (नेकपा) का वरिष्ठ नेता एवं पूर्वप्रधानमन्त्री माधवकुमार नेपालसँग छुट्टाछुट्टै भेटवार्ता गरेका छन्। 

महासंघका अध्यक्ष शेखर गोल्छाको नेतृत्वमा वरिष्ठ उपाध्यक्ष चन्द्रप्रसाद ढकाल, उपाध्यक्षहरू दिनेश श्रेष्ठ, अन्जन श्रेष्ठ, रामचन्द्र संघई र कोषाध्यक्ष सुकुन्तलाल हिराचन सम्मिलित प्रतिनिधिमण्डलले पूर्वप्रधानमन्त्रीद्वय देउवा र नेपालसँग औपचारिक भेटवार्ता गरेको हो। भेटका क्रममा अध्यक्ष गोल्छाले महासंघको नयाँ नेतृत्वले कोभिड संकटको अवस्थामा मुलुकको अर्थतन्त्रलाई सकुशलमाथि उठाउन निजी क्षेत्रको सुझावसहितको भिजन पेपर तयारी गरिरहेको जानकारी गराए। उनले सरोकारवाला निकाय एवं विज्ञहरूको समेत व्यापक सल्लाह, परामर्शमा रिसर्च र तथ्यमा आधारित भिजन पेपर तयार गरी सरकार तथा राजनीतिक दलहरूमा पेस गर्ने कार्यक्रम रहेको बताए। 

निजी क्षेत्रले सरकार तथा राजनीतिक दलहरूबाट मुलुकको आर्थिक पुनरुत्थानका लागि उत्तिकै सहयोगको अपेक्षा राखेको पनि गोल्छाले स्पष्ट पारे। 

भेटवार्तामा पूर्वप्रधानमन्त्रीद्वय देउवा र नेपालले महासंघका नवनिर्वाचित पदाधिकारीलाई बधाइ दिँदै उद्योग–व्यवसायको विकास विस्तारमा सक्रियतापूर्वक लाग्न नयाँ टिम सफल हुने विश्वास व्यक्त गरे। दुवैले आफ्नातर्फबाट सक्दो सहयोग गर्ने र आउँदा दिनमा पनि निरन्तर संवाद र सहकार्यमा रहने बताए।