अपर तामाकोशीकोे १ करोड कित्ता बढी सेयर बिक्रीमा,न्यूनतम मूल्य कति?

काठमाण्डौ । अपर तामाकोशी हाइड्रोपावरको सर्वसाधारण समूहको १ करोड कित्ता बढी अवितरित हकप्रद सेयर लिलामीमा राखिएको छ।

कम्पनीको सर्वसाधारण समूहतर्फको १ करोड ७० लाख ११ हजार ५३० कित्ता अवितरित हकप्रद सेयर आज(पुस १३ गते)देखि लिलामीमा राखिएको हो । 

कम्पनीको सेयर खरिदका लागि जो कोहि व्यक्ति, कम्पनी, तथा संघ संस्थाहरुले बोलपत्र आवेदन पेश गर्न सक्नेछन्।  न्यूनतम मूल्य प्रतिकित्ता १०० रुपैयाँ निर्धारण गरिएको सेयरमा बोलपत्र आवेदन पेश गर्दा न्यूनतम मूल्यमा नघट्ने गरी पेश गर्नुपर्नेछ। 

 यो सेयरको बिक्री प्रबन्धकको रुपमा सन राइज क्यापिटल रहेको छ । 

लगानीकर्ताले नागरिक लगानी कोष,सनराइज क्यापिटल र लक्ष्मी सनराइज बैंकका शाखा कार्यालयहरु,विराटनगर, धरान,विरगञ्ज,जनकपुर हेटौडा,नारायणगढ,पोखरा बाग्लुङ,बुटवल,नेपालगञ्ज,सुर्खेत,धनगढी र चरिकोटमा बोलपत्र आवेदन पेश गर्न सक्नेछन्। लगानीकर्ताले पुस २९ गतेसम्म बोलपत्र आवेदन पेश गर्नुपर्नेछ।  

कम्पनीले गत भदौ १८ गतेदेखि असोज २२ गतेसम्म शतप्रतिशत हकप्रद सेयर निष्कासन गरेको थियो । जसमध्ये सर्वसाधारण समूहलाई छुट्याईएको ५ करोड १८ लाख १९ हजार कित्ता सेयरमा ३ करोड ४८ लाख ७१ हजार ४७० कित्ता खरिदका लागि मात्रै आवेदन परेको थियो ।