अर्थतन्त्रमा महत्वपूर्ण सुधार हुँदैछ, उत्साही भएर काम गरौं : प्रधानमन्त्री

काठमाण्डौ । प्रधानमन्त्री पुष्पकमल दाहाल प्रचण्डले पछिल्लो एक वर्षमा मुलुकको अर्थतन्त्रमा अपेक्षाकृत राम्रो सुधार भएको बताएका छन् ।

सोमबार अर्घाखाँचीमा आयोजित कार्यक्रममा उनले आफ्नो एक वर्षको कार्यकालमा अर्थतन्त्र डुब्यो भन्ने आतंकबाट मुक्त भएको बताए ।

उनले भने, यस अवधिमा अर्थतन्त्रमा महत्वपूर्ण सुधार आएको छ । विदेशी मुद्राको सञ्चितिमा इतिहासमै ठूलो प्रगति भएको छ। पर्यटन आगमनमा गुणात्मक बृद्धि भएको छ। बैंकको ब्याजदरमा कटौती, सहकारी र लघुवित्तका समस्याको सम्बोधन, भुक्तानी सन्तुलन, विप्रेषणमा बृद्धिका साथै शिथिल भएको उद्योग–व्यवसाय क्षेत्र क्रमशः चलायमान हुन थालेको छ। यो खुसीको कुरा हो। त्यसैले उत्साही भएर काम गरौं ।’

‘

आफ्नो तेस्रो कार्यकालको पहिलो एक वर्षमा केहि नयाँ मानक स्थापित भएकाले त्यसको आधारमा टेकेर दोस्रो वर्ष थप उपलब्धिमूलक बनाउने उनको भनाइ छ ।

उनले एक वर्षको अनवरत प्रयासबाट देश र जनतासामु विद्यमान चुनौतीहरू सम्बोधन हुँदै गएको पनि दाबी गरे ।

आफू नियमित रूपमा विहान १० बजेभित्रै कार्यालय  पुगेर मन्त्रालयको रिपोर्टिङ लिने गरेको भन्दै उनले लक्ष्य अनुसार काम गर्ने कर्मचारीको जिम्वेवारी हेरफेर हुने पनि बताए ।

प्रधानमन्त्री प्रचण्डले आर्थिक संकटका कारण मुलुकका विभिन्न स्थानमा अघिल्लो वर्ष मेला महोत्सवहरू हुन नसकेको उल्लेख गर्दै यसवर्ष भने अभियानकै रुपमा महोत्सवहरू आयोजना हुनु अर्थतन्त्र सुधारका शुभसंकेत भएको पनि बताए।