काठमाण्डौ । एनएलजी इन्स्योरेन्स कम्पनी लिमिटेडले आर्थिक वर्ष २०७६/७७ मा वितरण गरेको बोनस सेयर सेयरधनीको हितग्राही (डिम्याट) खाता जम्मा गरिदिएको छ। 

कम्पनीले एक सूचना जारी गर्दै गत असार ३१ गते सम्पन्न कम्पनीको १५ औँ वार्षिक साधारणसभाबाट पारित भएको १० प्रतिशत बोनस सेयर सेयरधनीको डिम्याट खातामा जम्मा गरिदिएको जानकारी गराएको हो। बोनस सेयर नेपाल स्टक एक्सचेन्ज (नेप्से) र सीडीएसएसीमा सूचीकृत तथा दर्ता भई अभौतिक रुपमा कारोबार हुने व्यवस्था मिलाइएको पनि कम्पनीले जनाएको छ। 

गत साउन १३ गतेसम्म सेयर अभौतिकीकरण गराएका सेयरधनीहरुको बोनस सेयर सम्बन्धित डिम्याट खातामा जम्मा गरिएको कम्पनीले जनाएको छ। त्यसपछि सेयर अभौतिकीकरण गराएका सेयरधनीहरुको बोनस सेयर जम्मा गर्ने क्रममा रहेको र हालसम्म पनि सेयर अभौतिकीकरण नगरेका सेयरधनीहरुले आफ्नो सेयर अभौतिकीकरण गराई बोनस सेयर डिम्याट खातामा प्राप्त गर्न सकिने व्यवस्था गरिएको कम्पनीले जनाएको छ।

गत साउन १३ गतेसम्म सेयर धितो बन्धक राखी कर्जा लिएका सेयरधनीहरुलाई भने बोनस सेयरसमेत कर्जा प्रवाह गर्ने सम्बन्धित बैंक तथा वित्तीय संस्थाको नाममा नै रोक्का जनाई सेयरधनीहरुको डिम्याट खातामा जम्मा हुने हुँदा कर्जा राफसाफ भइसकेको भए सम्बन्धित बैंक तथा वित्तीय संस्थामा सम्पर्क गरी फुकुवा गर्न सेयरधनीहरुलाई कम्पनीले आग्रह गरेको छ। 

उक्त मितिपश्चात रोक्का राखिएका सेयरधनीहरुको बोनस सेयर सेयरधनीको हितग्राही खातामा रोक्का नजनाई जम्मा हुने हुँदा सम्बन्धित बैंक तथा वित्तीय संस्थाले उक्त सेयरधनीहरुको सेयर रोक्कामा रहेको वा नरहेको यकिन गरी रोक्कामा राख्नुपर्ने भए बोनस सेयरसमेत रोक्कामा राख्नेतर्फ आवश्यक प्रक्रिया अगाडि गर्नुपर्ने कम्पनीले आग्रह गरेको छ। 

कम्पनीले आर्थिक वर्ष २०७६/७७ मा कुल १०.५२६३ प्रतिशत लाभांश वितरण गरेको थियो। जसमा १० प्रतिशत बोनस सेयर र ०.५२६३ प्रतिशत नगद लाभांश (कर प्रयोजनार्थ) रहेका थिए।