एप्पलका प्रडक्टमा सुरक्षा कमजोरी पत्ता लगाउनुस्, जित्नुस् रु. १७.१२ करोड

काठमाण्डौ । टेक्नोलोजी कम्पनी एप्पलले आफ्नो प्रडक्ट र अपरेटिङ सिस्टमको सुरक्षा कमजोरी पत्ता लगाउनेलाई करोडौँ रकम पुरस्कारस्वरुप दिने घोषणा गरेको छ ।

कम्पनीले आफ्ना प्रडक्ट र अपरेटिङ सिस्टम अन्य कम्पनीको सबैभन्दा सुरक्षित रहेको दाबी गर्दै आम मानिसलाई सुरक्षा कमजोरी पत्ता लगाउन चुनौती दिँदै पुरस्कारको घोषणा गरेको हो । कम्पनीले सेक्युरिटी बाउन्टी प्रोग्राम घोषणा गर्दै जो व्यक्तिले एप्पलको प्रडक्टमा सुरक्षा कमजोरी पत्ता लगाउँछ उसलाई १७.१२ करोड रुपैयाँ पुरस्कारस्वरुप दिने जनाएको छ । 

एप्पलले यदि कसैले यस्तो सुरक्षा कमजोरी पत्ता लगाए जुनबारे कम्पनी स्वयम् नै जानकार छैन भने उसले पुरस्कार पाउने जनाएको छ । त्यस्तै उक्त कमजोरीबारे कम्पनीका सिस्टम डेभलपरहरुलाई पनि थाहा नभएमा थप ८.५६ करोड रुपैयाँ पुरस्कार राशि थपिने घोषणा गरेको छ ।

यसअघि गत अगस्टमा पनि कम्पनीले केबल बग प्रोग्रामलाई लिएर यस्तो घोषणा गरेको थियो । यद्यपि यसपालि भने सबै सेक्युरिटी रिसर्चरलाई खुला चुनौती दिँदै एप्पलले सुरक्षा कमजोरी पत्ता लगाउनेले यति ठूलो धनराशि पुरस्कार दिने घोषणा गरेको हो । – एजेन्सी