काठमाण्डौ । नेपाल पुनर्बिमा कम्पनीले सर्वसाधारण र आफ्ना कर्मचारीका लागि १ अर्ब ६० करोड बराबरको आइपीओ निश्कासन गर्ने भएको छ ।

यसका लागि कम्पनीले आरबीबी मर्चेन्ट बैंकिंग लिमीटेडले निश्कासन तथा बिक्री प्रबन्धक तोकेको छ । 

नेपाल रिइन्स्योरेन्स कम्पनीका अध्यक्ष चिरायू भण्डारी र आरबीबी मर्चेन्ट बैंकिंग लिमीटेडका प्रमुख कार्यकारी अधिकृत डा. रमेशकुमार भण्डारीले आइपीओ निश्कासनमा बिक्री प्रबन्धक नियुक्ति सम्बन्धी सम्झौता पत्रमा हस्ताक्षर गरेका छन् । 

यो कम्पनीले चुक्तापूँजीको १५ प्रतिशत सर्वसाधारणका लागि र बाँकी १ प्रतिशत कर्मचारीका लागि गरी कुल १६ प्रतिशत साधारण सेयर निश्कासन गर्न चाहेको हो । 

 

नेपाल पुनर्बीमा कम्पनीको अधिकृत पूँजी रु.१५ अर्ब, जारी पूँजी रु. १० अर्ब, र चुक्तापूँजी रु. ८ अर्ब ४०  करोड रहेको छ भने सर्वसाधारणहरुलाई शेयर निष्काशन गरी बाँडफाँट गरे पश्चात संस्थाको चुक्तापूँजी रु.१० अर्ब  हुनेछ । 
 
सार्वजनिक तथा निजी साझेदारी नीति अन्तर्गत नेपाल सरकारको समेत स्वामित्व रहेको नेपाल पुनर्बीमा कम्पनी लिमिटेड कम्पनी ऐन, २०६३ अन्तर्गत २०७१ साल कात्र्तिक २१ गते  पब्लिक लिमिटेड कम्पनीको रुपमा कम्पनी रजिष्ट्रार कार्यालयमा दर्ता भई २०७१ साल पौष ४ गते बिमा समितिबाट  पुनर्बीमाको इजाजतपत्र प्राप्त गरेको यस पुनर्बीमा कम्पनीले २०७२ साल श्रावण १ गतेदेखि आफ्नो पुनर्बीमाको कारोवारको शुुभारम्भ गरेको हो । 
 
थापाथली, काठमाण्डौमा केन्द्रीय कार्यालय रहेको यस पुनर्बीमा कम्पनीले स्थापनाको छोटो अवधिमै  स्वदेशका जिवन तथा निर्जीवन बीमा कम्पनी र बिदेशी बीमा तथा पुनर्बीमा कम्पनीहरुसँग कारोबार गरी  आ.ब.२०७४/७५ अन्त्य सम्म कुल रु.४ अर्ब पुनर्बीमा शुल्क संकलन तथा रु. ९ अर्ब ४० करोड लगानी गर्न सफल भएको छ । 
 
त्यसैगरी आ.ब.२०७३/७४ मा रु ६० करोड ७६ हजार खुद मुनाफा आर्जन गरेको र  जगेडा कोषमा  रु. १ अर्ब ८५ करोड रहेको थियो भने आ.ब.२०७४/७५ को चौथो त्रैमासिक अवधि सम्ममा अनुमानित रु. १ अर्ब ४० करोड खुद मुुनाफा हासिल गर्न सफल भएको छ  । 
 
यो कम्पनीले कति चाँडो आइपीओ निश्कासन गर्छ भन्ने कुरा नेपाल सरकारमा निर्भर रहेको देखिन्छ । कारण, यो कम्पनीमा नेपाल सरकारको सेयर स्वामित्व सबैभन्दा बढी छ । हाल कम्पनीमा नेपाल सरकारको ४३.५५ प्रतिशत सेयर स्वामित्व रहेको छ भने बाँकी विभिन्न कम्पनी तथा संघसंस्थाको लगानी रहेको छ । यसरी हेर्दा नेपाल सरकारले पूँजी पुर्याउन कम्पनीलाई जति छिटो कमिटमेन्ट दिन्छ, उति छिटो सर्वसाधारणका लागि आइपीओ निश्कासन गर्ने कामले गति पाउने बताइएको छ ।

आइपीओपछि कम्पनीमा संस्थापकःसर्वसाधारण सेयरधनीको स्वामित्व संरचना ८४ः१६ हुनेछ । 

आफ्नो आइपीओप्रति सर्वसाधारणलाई आकर्षित बनाउन कम्पनीले पूँजी पुगेपछि १ अर्ब बराबरको बोनस सेयर समेत वितरण गर्ने घोषणा समेत गरेको छ । कम्पनीले बेस रेटमै आइपीओ निश्कासनको तयारी गरिरहेको हो ।