काठमाण्डौ । बैंक अफ काठमाण्डूसँग मर्जर प्रक्रिया पूरा गरी एकीकृत कारोबार सुरु गरिसकेको ग्लोबल आइएमई बैंक लिमिटेडले चालु आर्थिक वर्षको दोस्रो त्रैमाससम्मको अपरिष्कृत वित्तीय विवरण सार्वजनिक गरेको छ।

समीक्षा अवधिसम्म बैंकले २ अर्ब ७८ करोड रुपैयाँ बढी खुद नाफा आर्जन गर्न सफल भएको छ। गत वर्ष यही अवधिसम्म बैंकले २ अर्ब ६६ करोड रुपैयाँ खुद नाफा आर्जन गरेको थियो। यो हिसाबले गत वर्षको तुलनामा खुद नाफा ४.४७ प्रतिशतले बढेको छ। 

यो अवधिसम्म बैंकको वितरणयोग्य मुनाफा १ अर्ब ११ करोड रुपैयाँ रहेको छ।

दोस्रो त्रैमाससम्म बैंकले ३ अर्ब ७९ करोड रुपैयाँ सञ्चालन मुनाफा आर्जन गरेको छ। जुन गत वर्षको यही अवधिसम्मको तुलनामा ३.१९ प्रतिशतले बढी हो। गत वर्ष यही अवधिसम्म बैंकको यस्तो मुनाफा ३ अर्ब ६७ करोड रुपैयाँ रहेको थियो।

बैंकले चालु आर्थिक वर्षको ६ महिनामा ६ अर्ब ५४ करोड रुपैयाँ खुद ब्याज आम्दानी गरेको छ। गत वर्ष यही अवधिमा बैंकको यस्तो आम्दानी ४ अर्ब ७९ करोड रुपैयाँ रहेको थियो। यो हिसाबले ब्याज आम्दानी ३६.४५ प्रतिशतले उकालो लागेको छ। 

बैंकको चुक्तापुँजी ३५ अर्ब ७७ करोड रुपैयाँको उचाइमा पुगेको छ। रिजर्भ पनि ७१.१४ प्रतिशतले बढेर १८ अर्ब ३१ करोड रुपैयाँको उचाइमा पुगेको छ। गत वर्ष यही अवधिसम्म रिजर्भमा १० अर्ब ७० करोड रुपैयाँ रहेको थियो।

समीक्षा अवधिसम्म बैंकले ४ खर्ब ३ अर्ब रुपैयाँ निक्षेप संकलन गरी ३ खर्ब ६३ अर्ब रुपैयाँ कर्जा परिचालन गरेको छ। गत वर्ष यही अवधिसम्म बैंकले २ खर्ब ७६ अर्ब रुपैयाँ निक्षेप संकलन गरी २ खर्ब ५८ अर्ब रुपैयाँ कर्जा परिचालन गरेको थियो। 

बैंकको निष्क्रिय कर्जा (एनपीएल) बढेर २.९२ प्रतिशत पुगेको छ। गत वर्ष यही अवधिसम्म एनपीएल १.१३ प्रतिशतमा सीमित रहेको थियो।

सीडी रेसियो ८९.४३ प्रतिशत रहेको बैंकको आधार दर १०.८० प्रतिशत रहेको छ। 

बैंकको वार्षिकीकृत प्रतिसेयर आम्दानी (ईपीएस) घटेर १८.०७ रुपैयाँमा झरेको छ। गत वर्ष यही अवधिसम्म ईपीएस २२.३९ रुपैयाँ रहेको थियो।

पीई रेसियो ११.६४ गुणा रहेको बैंकको प्रतिसेयर नेटवर्थ १५४.३४ रुपैयाँ र तरलता अनुपात २३.०५ प्रतिशत रहेको छ।